महिन्द्रा स्कर्पियोसंग प्रतिस्पर्धा गर्न टाटाले नयाँ एसयूभी ल्याउँदै, इलेक्ट्रिकमा पनि आउने

टाटा मोटर्सले भारतको एसयूभी बजारमा नयाँ आयाम थप्दै स्कारलेट कोडनेम भएको नयाँ कम्प्याक्ट एसयूभी लन्च गर्ने तयारी गरिरहेको छ । महिन्द्रा स्कर्पियो र बोलेरोजस्ता लोकप्रिय गाडीसँग प्रतिस्पर्धा गर्ने उद्देश्यले लन्च गर्न लागिएको सो नयाँ मोडल टाटाको एसयूभी पोर्टफोलियोमा महत्त्वपूर्ण कोशेढुङगा सावित हुने अपेक्षा गरिएको छ।

नयाँ स्कारलेटको डिजाइन सिएराको डिजाइनसँग मिल्दोजुल्दो हुनेछ । हालसम्म टाटाले स्कारलेटबारे आधिकारिक रूपमा धेरै जानकारी नदिए पनि यसमा धेरै पावरट्रेन विकल्प हुने अनुमान गरिएको छ। साथै टाटाले स्कारलेटको अल-इलेक्ट्रिक भेरिएन्ट पनि ल्याउने योजना बनाइरहेको छ ।

स्कारलेटको मूल्य लगभग नेक्सन समान हुने अनुमान गरिएको छ। हाल नेक्सनको मूल्य आईसीई भेरिएन्टका लागि ८ लाखदेखि १५ लाख भारु र ईभी भेरिएन्टका लागि १२ लाख ४९ हजारदेखि १७ लाख १९ हजार भारु रहेको छ।

स्कारलेटसँगै टाटाले आफ्नो इलेक्ट्रिक गाडीको लाइनअपलाई थप विस्तार गर्दैछ। कम्पनीले दुईवटा नयाँ सब-४-मिटर अल-इलेक्ट्रिक मोडल कुनो र टेरा ल्याउने  तयारीमा छ। सो नयाँ मोडल टाटाले ईभी सेगमेन्टमा लन्च गर्नेछ । साथै हरेक सेगमेन्टमा इन्ट्री लेवल, मिड लेवल र प्रिमियम लेवलमा उपलब्ध गराउने लक्ष्य राखिएको छ। यद्यपि स्कारलेट बजारमा आउन अझ केही समय लाग्नेछ ।