१३० किलोमिटर प्रति घण्टाको स्पिडमा एक्सपेङ जी७ को अटोनोमस इमर्जेन्सि ब्रेकिङ परिक्षण

एक्सपेङले हालै लन्च गरेको नयाँ बिद्युतिय एसयुभी जी७ लाई १३० किलोमिटर प्रति घण्टाको गतिमा कुदाएर अटोनोमस इमर्जेन्सि ब्रेकिङको परिक्षण गरिएको छ । उक्त परिक्षणमा कारको अटोनमस इमर्जेन्सि ब्रेकिङ सिस्टमले सफलतापूर्बक काम गरेको जनाइएको छ ।

जी७ लाई उच्च स्पिडमा कुदाएर अगाडी राखिएको वस्तुसंग ठोक्याउन खोज्दा उक्त वस्तुलाई डिटेक्ट गरी स्वचालित रुपमा ब्रेक लागेको थियो । यसबाट उच्च स्पिडमा पनि कार ठोक्किनबाट जोगिएको र सुरक्षित रहेको उल्लेख गरिएको छ ।

एक्सपेङले जी७ लाई चीनमा गत जुन ११ मा सार्वजनिक गरेको थियो । कारले बुकिङ खुलेको केवल ४६ मिनेटमै १० हजार भन्दा बढी अर्डर पाएको थियो ।

जी७ मा एक्सपेङद्वारा विकास गरिएको टुरिङ एआई चिप, हुवावेसँगको सहकार्यमा तयार गरिएको ८७ इन्चको एआर–एचयूडी डिस्प्ले, उच्च स्तरीय स्वचालित ड्राइभिङ सुविधा र ५सी अल्ट्र–(फास्ट चार्जिङ जस्ता अत्याधुनिक प्रविधिहरू उपलब्ध छन् ।

७०० किलोमिटरसम्मको अधिकतम रेञ्जका कारण जी७ ले इन्टेलिजेन्ट मोबिलिटीको नयाँ मापदण्डको रूपमा आफूलाई स्थापित गरेको छ ।