एक वर्षमै ३ लाख युनिट टीभीएस आईक्युब बिक्री, नेपालमा चर्चा कमाउँदै

टीभीएसले गत वर्ष भारतमा ३ लाख युनिट भन्दा बढी आईक्युब स्कुटर बिक्री गरेको छ । सोसाइटी अफ इन्डियन अटोमोबाइल म्यानुफ्याक्चरर्सका अनुसार टीभीएसको सो इलेक्ट्रिक स्कुटर हालसम्म ६ लाख २६ हजार २९७ युनिट बिक्री भएको छ ।

टीभीएस आइक्युबको पहिलो १ लाख युनिट बिक्री हुन ३ वर्षभन्दा बढी समय लागेकोमा अर्को १ लाख युनिट भने केवल १० महिनामै बिक्री भएको थियो । मे २०२४ को सुरुवाती महिनामा आफ्नो बिक्री कुल ३ लाख युनिट पु-याएको कम्पनीले त्यसपछिको १ वर्षमा ३ लाखभन्दा बढि युनिट बिक्री गरेको हो ।

आर्थिक वर्ष २०२५ मा ब्रान्डको समग्र स्कुटर बिक्रीमा आईक्युबले आफ्नो बजार हिस्सा २६ प्रतिशत पु-याएको थियो । जुन गत वर्षको तुलनामा ११ प्रतिशतले बढी हो ।

आईक्युब भारतीय बजारका लागि टीभीएसको पहिलो इलेक्ट्रिक स्कुटर हो । २०२० मा लन्च गरिएको आईक्युबले बजाज चेतक, ओला एस१ र एथर रिज्टासँग प्रतिस्पर्धा गरिरहेको छ ।

यस वर्ष टीभीएसले आईक्युबमा ठूलो ब्याट्री दिएर १ लाख रुपैयाँ भन्दा कम मूल्यमा २०२५ संस्करण लन्च गरेको छ । यो ई–स्कुटर तीन ब्याट्री २.२ किलोवाट आवर, ३.५ किलोवाट आवर र ५.३ किलोवाट आवर गरी कुल तीनवटा ब्याट्री अप्सनमा उपलब्ध छ । यसले एकपटकको फुल चार्जमा २१२ किलोमिटरसम्मको रेन्ज प्रदान गर्ने दाबी गरिएको छ ।

आईक्युब नेपाली बजारमा समेत उपलब्ध रहँदै आएको इलेक्ट्रिक स्कुटर हो । जगदम्बा मोटर्सले बिक्री गर्दै आएको यस स्कुटर नेपाली बजारमा भने २.२ र ३.५ किलोवाट आवरको ब्याट्री प्याक सहित कुल ३ भेरिएन्टमा उपलब्ध छ । नेपाली बजारमा प्रिमियम इलेक्ट्रिक स्कुटरको रुपमा चर्चा कमाउँदै गरेको यसको मूल्य ३ लाखदेखि ४ लाख ३० हजार रुपैयाँसम्म पर्छ ।