नेपालकै लागि भनेर डिजाइन गरिएको फोटोन ‘टुनल्यान्ड जी७’ सार्बजनिक हुने तयारीमा

काठमाडौं–फोटोनले नयाँ पिकअप ट्रक ‘टुनल्यान्ड जी७’ नेपाली बजारमा सार्बजनिक गर्ने तयारी गरेको छ । ‘बिल्ट फर हिमालयज’ नारासहित सार्वजनिक हुन लागेको यो पिकअप गाडी नेपालको कठिन भौगोलिक संरचनामा उत्कृष्ट प्रदर्शन गर्ने हिसाबले निर्माण गरिएको बताइएको छ ।

फोटोन चीनको अग्रणी कमर्सियल भेइकल निर्माता रहेको र यसले पहिलो अटोनोमस कमर्सियल भेहिकल सार्वजनिक गर्ने इतिहास समेत कायम गरेको छ । प्रविधि र नवीनतालाई प्रयोग गरेर फोटोनले आफ्नो उत्पादनको बजार निरन्तर विस्तार गर्दै आएको छ ।

कम्पनीका अनुसार नेपालको हिमाली बाटो र पहाडी भेगको चुनौतीलाई सहज पार गर्ने क्षमतासहित जी७ मा १६० हर्सपावर र ३९० एनएम टर्क शक्ति उपलब्ध छ । २२५ मिमीको ग्राउन्ड क्लियरेन्स, हिल होल्ड कन्ट्रोल र हिल डिसेन्ट कन्ट्रोल जस्ता विशेषताले अप्ठ्यारा सडकमा पनि सुरक्षित र भरपर्दो यात्रा सुनिश्चित गर्नेछ ।

अटानोमस प्रविधिमा आधारित टुनल्यान्ड जी७ ले सुरक्षा, शक्ति र स्मार्ट सुविधा एकसाथ प्रदान गर्ने दाबी गरिएको छ ।

यस पिकअप ट्रकमा १२.३ इन्चको इन्फिनिटी टचस्क्रिन, पुस बटन स्टार्ट, स्वचालित एयर कन्डिसनिङ, प्यानोरामिक सनरूफ, र हीटेड–भेन्टिलेटेड सिट जस्ता प्रिमियम सुविधा उपलब्ध छन् । सिटहरू १२ तरिकाले इलेक्ट्रिक रूपमा एड्जष्ट गर्न मिल्ने हुँदा यात्रा आरामदायी हुनेछ ।

व्यापारिक प्रयोजनका साथसाथै पारिवारिक यात्रा वा एडभेन्चर ट्रिपका लागि समेत उपयुक्त विकल्प बन्न सक्ने विश्वास लिइएको यस गाडीलाई फोटोनले नेपालकै लागि भनेर डिजाइन गरेको हो ।