सेरेसको बिक्रीमा दोहोरो अंकको वृद्धि

सन् २०२५ को अप्रिलमा सेरेसले ३१ हजार ४८८ न्यु इनर्जी भेइकल बिक्री गरेर नयाँ रेकर्ड कायम गरेको छ । सन् २०२५ को पहिलो त्रैमासिकमा बिक्री घटेको सेरेसले अप्रिलमा पहिलो पटक बिक्री बढाएको छ भने गत वर्षको यही अवधिको तुलनामा १२.९९ प्रतिशत बढी सवारी बिक्री गरेको छ ।

चीनको टेक्नोलोजी जायन्ट हुवावेसँगको सहकार्यमा विभिन्न मोडल उत्पादन पश्चात सेरेसको न्यु इनर्जी भेइकल बजारमा तीव्र रुपमा चर्चा चुलिन थालेको बताइएको छ । यसको फ्ल्यागसिप मोडल एइटो एम९ मा भएको एड्भान्स्ड इन्टेलिजेन्ट ड्राइभिङ टेक्नोलोजीले पहिले बीएमडब्लु, मर्सिडिज बेन्ज र आउडी जस्ता लक्जरी गाडी प्रयोग गरिरहेका व्यक्तिहरुलाई आकर्षित गरिरहेको छ । ५० हजार युआन अर्थात करिव ७० हजार डलर मूल्य पर्ने चीनको लक्जरी भेइकल सेल्स चार्टमा एम९ ले लगातार ११ महिना सम्म शीर्ष स्थान हासिल गरेको छ ।

यद्यपि सेरेसलाई २०२५ को पहिलो क्वाटरमा भने धक्का लाग्न गएको थियो । गत वर्षको तुलनामा प्रत्येक महिना बिक्री घट्दै जादा सेरेस समस्यामा देखिएको थियो । तर यसको मुख्य कारण भने विभिन्न मोडलको संक्रमणकालीन समय भएको विश्लेषकहरुले बताएका छन् । एइटो एम९ र एम८ जस्ता नयाँ मोडल प्रयोग गर्न उपभोक्ताहरुले केही ढिलाई गरे । २०२५ मोडलका यी गाडी आए पश्चात बिक्री बढ्दै गएको बताइएको छ ।

गत मार्च २० मा हुवावे र सेरेसले नयाँ अपग्रेडेड मोडलको रुपमा २०२५ एइटो एम९ लन्च गरेका थिए । यो भन्दा पहिले जनवरीमा १२ हजार भन्दा बढी युनिट बिक्री गरेको एम९ को बिक्री फेब्रुअरी र मार्चमा ५ हजार भन्दा बढी मात्र भएको थियो । तर अप्रिलमा भने एकै पटक बिक्री बढेर १३ हजार भन्दा बढी पुगेको छ ।

अप्रिल १६ मा लन्च गरिएको एम८ कम्पनीका लागि अर्को माइलस्टोन बन्ने भएको छ । लिडार र हार्मोनी ओएस लगायतका फिचर भएको एम८ ले एक महिना भन्दा कम अवधिमै ७० हजार प्रि–अर्डर पाइसकेको छ । ३ लाख ६० हजार र ४ लाख ५० हजार युआन बिच मूल्य पर्ने अनुमान गरिएको एम८ डेलिभरीको लागि प्रतीक्षारत छ ।

सन् २०२४ मा सेरेसले ४ लाख २६ हजार ८८५ न्यु इनर्जी भेइकल बिक्री गरेको थियो । सन् २०२५ को पहिलो क्वाटरमा खाएको धक्काका कारण यो वर्षको बिक्रीमा प्रभाव पर्ने सम्भावना छ । यद्यपि पछिल्लो समयमा बढेको यसको बिक्रीले भने पक्कै पनि सहयोग गर्न सक्छ ।