यात्री र सिप्रदी मिलेर अब ‘मेड इन नेपाल’ इलेक्ट्रिक स्कुटर बनाउने, बाहिरियो टिजर

काठमाडौं – नेपालमै इलेक्ट्रिक मोटरसाइकल बनाएर चर्चा कमाएको यात्री मोटरसाइकल्सले अब सिप्रदी ट्रेडिङसँगको सहकार्यमा ‘मेड इन नेपाल’ इलेक्ट्रिक स्कुटर बनाउने भएको छ ।

यात्री मोटरसाइकल्सले आफ्नो सामाजिक सञ्जालमार्फत यसको जानकारी दिएको छ । केही समय पहिले यात्रीले सिप्रदीसँग सहकार्य गर्ने जानकारी सार्वजनिक भएको थियो । त्यस पश्चात पहिलो पटक यो जानकारी वाहिरिएको हो ।

यात्रीले निर्माण गरेको मोटरसाइकलको नाम पी१ थियो भने स्कुटरका लागि पी२ नाम दिइएको छ । टिमको अथक मेहनत पश्चात आन्तरिक रुपमा ‘पी२ डिजाइन प्रस्तुतीकरण’ गरिएको यात्रीले बताएको छ । आगामी दिनमा यसलाई अझै प्रमाणिकरण गरिने र वर्षको अन्त्य सम्ममा उत्पादन हुने बताइएको छ ।

नयाँ पी२ प्लेटफर्मको वारेमा आफूहरु निकै नै उत्साही भएको भएको समेत यात्रीले बताएको छ ।

यात्रीका उत्पादन विकास, निर्माण र प्रवर्धन गर्नका लागि यात्री र सिप्रदी बिच गत वर्षको असार महिनामा सम्झौता भएको थियो । देशकै प्रतिष्ठित ब्रान्ड सिप्रदी मुख्यतः अटोमोटिभ तथा एलाइड व्यवसायमा सन् १९८२ वर्षदेखि आवद्ध रहेको छ ।