८ हजार ३०० डलरमै आयो चेरीको नयाँ मिनि कार, यस्तो छ रेन्ज र विशेषता

काठमाडौं–चिनियाँ अटो निर्माता चेरीले नयाँ क्यूक्यू डमी इलेक्ट्रिक कार लन्च गरेको छ । उक्त नयाँ कारको सुरुवाती मूल्य ८ हजार ३०० डलर निर्धारण गरिएको छ । कम्प्याक्ट ह्याचव्याक सेग्मेन्टमा पर्ने यस नयाँ कारमा ५ सिट लेआउट र ५ वटै ढोका राखिएको छ ।

सो नयाँ कारको लम्वाई ३ हजार ७२० एमएम, चौडाई १ हजार ७०० एमए, उचाई १ हजार ६०८ एमएम तथा ह्विलवेश २ हजार ५२० एमएम छ । वाहिरी लुक्स निकै आकर्षक देखिने क्यूक्यू डमीको इन्टेरियरलाई डुअल टोन कलरमा सजाइएको छ ।

कारमा ७ इन्चको डिजिटल इन्स्ट्रयुमेन्ट प्यानल, १०.२५ इन्चको फ्लोटिङ सेन्ट्रल टचस्क्रिन, भ्वाइस रिकग्निसन, किलेस इन्ट्रि र पछाडीको सिटलाई ४०ः६० को अनुमातमा फोल्ड गर्न मिल्ने लगायत फिचर दिइएको छ । सेन्टर कन्सोललाई खुल्ला राख्न कारको स्टेरिङ ह्विलमै गियर सेलेक्टर माउन्ट गरिएको छ ।

क्यूक्यू डमीलाई चेरीले २८.५ किलोवाट आवर र ३९.३३ किलोवाट आवर ब्याट्री प्याकमा उपलब्ध गराएको हो । यी दुबै भेरिएन्टमा ४० किलोवाट क्षमताको फ्रन्ट माउन्टेड मोटर राखिएको छ, जसले ११० एनएम टर्क जेनेरेट गर्दछ । यस नयाँ कारलाई १०० किलोमिटर प्रतिघण्टाको उच्चतम गतिमा हाँक्न सकिन्छ ।

सिंगल चार्जमा ३०५ र ४०५ किलोमिटर रेन्ज दिने दाबी गरिएको यस कारलाई फास्ट चार्जरको साहयताले ३० मिनेटभित्रै ३० देखी ८० प्रतिशतसम्म चार्ज गर्न सकिन्छ । साथै, यसको लङ रेन्ज भेरिएन्टमा भेइकल–टु–लोड फिचर समेत उपलब्ध छ ।