गाडीको ग्राउन्ड क्लियरेन्स बढाउन मिल्ने रोजरएब एसेसरिज नेपाली बजारमा

काठमाडौं– गाडीको ग्राउन्ड क्लियरेन्स बढाउन मिल्ने नयाँ एसेसरिज भित्रिएको छ । कार केयर लाउन्ज प्रालिले रोजरएब ब्रान्डको यस्तो एसेसरिज नेपाल ल्याएको हो । ग्राउन्ड क्लियरेन्स कम भएका जुनसुकै गाडीमा यसलाई जडान गर्न सकिने कम्पनीको भनाई छ ।

रोजरएबलाई गाडीको चारवटै सस्पेन्सन क्वाइलमा ३० मिनेटमै जडान गर्न सकिन्छ । कम्पनीका अनुसार यो सर्टिफाईड प्रोडक्ट समेत हो । यसमा पाँच वर्षको ग्यारेन्टी छ । पाँच वर्षभित्र कुनै समस्या भएमा कम्पनीले यो उत्पादनलाई प्रतिस्थापन गर्छ ।

रोजरएब जडान भएपछि गाडीको ग्राउन्ड क्लियरेन्स एकदेखि डेढ इन्चसम्म बढ्ने बताइएको छ । यसले गाडीलाई अफरोडमा हल्लिने र जर्क हुने समस्याबाट मुक्ति दिन्छ भने कच्ची सडकमा गाडी चलाउँदा सस्पेन्सन बिग्रनबाट जोगाउँछ । साथै, गाडी खराब बाटोमा चलाउँदा पनि ह्यान्डलिङ राम्ररी गर्न सकिन्छ र निकै सहज फिल हुन्छ ।

भारतस्थित रोज कम्पनीले बनाएको प्याटेन्ड प्रोडक्ट भएका कारण यसलाई अरु कम्पनीले कपि गरेर उत्पादन गर्न नसक्ने बताइएको छ । नेपालमा अहिले यसको सफल परीक्षण र जडान तथा डिलरशिप विस्तार भइरहेको छ । हाई ग्रेड सिलिकनले बनेको हुँदा यो निकै गुणस्तरीय रहेको कम्पनीले दाबी गरेको छ ।

कार र एसयुभीमा प्रयोग हुने यो प्रोडक्ट जम्मा सातवटा साइजमा उपलब्ध रहँदै आएको छ । कम्पनीले यो प्रोडक्टमा ३० दिनको ‘वाइ ब्याक वारेन्टी’ पनि दिएको छ । कम ग्राउन्ड क्लियरेन्स भएका गाडीका लागि यो प्रोडक्ट निकै उपयोगी हुने र त्यसमा पनि इभीका लागी यो झनै प्रभावकारी हुने दाबी गरिएको छ । नेपालमा यसको प्रयोग टोयोटाको आधिकारिक सर्भिस सेन्टरले गर्न थालिसकेको छ ।