एलोन मस्क राजनीतिमा अल्झिदा युरोपमा बीवाईडीलाई ठूलो फाइदा, युरोपबाट कसरी हराउँदै छ टेस्ला ?

विद्युतीय सवारी साधन बजारमा एलोन मस्कको टेस्ला र बीवाईडीबीच कडा प्रतिस्पर्धा छ । टेस्लाले आफ्नो प्रविधि र ब्रान्ड मुल्यको आधारमा बजारमा बलियो पकड बनाएको छ भने बीवाईडी आफ्नो किफायती र उन्नत प्रविधिको विद्युतीय सवारी साधनहरूको साथ दु्रत गतिमा अगाडि बढिरहेको छ ।

गत महिना युरोपमा चीनको बीवाईडीले टेस्लाभन्दा बढी विद्युतीय कारहरू बिक्री गरेर नयाँ रेकर्ड कायम गरेको छ । चीनमा टेस्लाको लोकप्रियतामा धेरै क्षति पुर्याएको बीवाईडीको यस उपलब्धीले आक्रामक रणनीति र युरोपेली उपभोक्तामाझ एलोन मस्कको कम्पनीले सामना गरिरहेको समस्यालाई प्रतिबिम्बित गर्दछ ।

अनुसन्धान फर्म जाटो डाइनामिक्सको तथ्याङ्क अनुसार, बीवाईडीले टेस्लालाई १०० भन्दा कम सवारी साधनको अन्तरले उछिनेको छ । गत महिना युरोपमा बीवाईडीले ७ हजार २३१ पूर्ण ब्याट्रीबाट चल्ने कारहरू बेचेको थियो भने टेस्लाले ७ हजार १६५ वटा बेचेको थियो ।

‘यो अन्तर सानो भए पनि, यो युरोपेली कार बजारका लागि खराव संकेत होे’ जाटो विश्लेषक फेलिप मुनोजले एक विज्ञप्तिमा भने । उनका अनुसार, युरोपेली उपभोक्ताले चिनियाँ विद्युतीय कारहरूलाई अँगाल्न तयार रहेको देखाउँछ ।

गत वर्ष टेस्लाका प्रमुख कार्यकारी एलोन मस्कले राष्ट्रपति ट्रम्पलाई समर्थन गर्न थालेदेखि नै युरोपमा टेस्लाको बिक्री सुस्त थियो । उनले ह्वाइट हाउसमा महत्वपूर्ण नियुक्ती सहित राजनितीमा सक्रियता बढाउन थालेसंगै युरोपमा टेस्लाको लोकप्रियता खस्किन थालेको हो । युरोपमा उनी अलोकप्रिय हुन थालेसंगै टेस्लाको ब्यापार ४९ प्रतिशतले घट्दा बीवाईडीको भने १७० प्रतिशतले बढेको छ ।

सन् २०१४ मा पहिलोपटक नर्वेमार्फत युरोपेली बजारमा प्रवेश गरेको टेस्लाले २०२२ मा बर्लिन बाहिरको प्लान्टमा उत्पादन सुरु गरेको थियो । त्यही वर्ष बीवाईडीले पनि नर्वे र नेदरल्याण्ड्समा कारहरू बेच्न थालेको थियो । बीवाईडीले हाल हंगेरी र टर्किमा आफ्नो अत्याधुनिक प्लान्ट निर्माण गरिरहेको छ । यी प्लान्टमार्फत उत्पादन हुने कारले युरोपमा एकछत्र राज गर्ने उसको लक्ष्य छ ।