१० लाख रोयल इन्फिल्ड बिक्री हुँदा नेपाल १० प्रतिशत बढीको अन्तर्राष्ट्रिय बजार

रोयल इन्फिल्डले एक आर्थिक वर्षमा विश्वभर १० लाख मोटरसाइकल बिक्री गरेर नयाँ रेकर्ड कायम गरेको छ । सोही समाचारले विश्व बजार तताइरहेको समयको छेको पारेर नेपालमा पनि नयाँ मोटरसाइकल न्यु क्लासिक ३५० सार्वजनिक गरियो ।

सो समारोहमा रोयल इन्फिल्डका चिफ कमर्सियल अफिसर यादविन्दर सिंह गुलेरिया आफै उपस्थित भए । उनले सो मोटरसाइकल लन्च गर्नुका साथै रोयल इन्फिल्डको लोभ लाग्दो प्रगति वारेमा विशेष प्रस्तुतिकरण समेत गरे ।

रोयल इन्फिल्डका लागि नेपाल एउटा आकर्षक बजार बनेको छ । विशेष गरी अल्फा अटोमोटिभले नयाँ आयातकर्ताको रुपमा आफूलाई उभ्याउँदै नयाँ रणनीतिका साथ नेपाली बजारमा अगाडि बढे पश्चात झन यसको चर्चा बढ्दो छ ।

सन् १९०१ बाट बिक्री प्रारम्भ भएको रोयल इन्फिल्डका बाइक हाल नेपाल सहित १२० देशका राइडरहरुले प्रयोग गर्छन् भने ६९ देशबाट बिक्री हुन्छ । ६९ देशमा बिक्री हुने बाइक नै अन्य देशमा समेत विभिन्न राइडरहरुले पु-याउने गरेको पाइन्छ ।

नेपालमा त भारतबाट ल्याएको किट्स नै एसेम्बल भएर बिक्री हुन्छ । यसको अर्थ नेपालमा रोयल इन्फिल्डको एसेम्बलिङ प्लान्ट नै छ । यसकारण पनि पहिले भन्दा कम मूल्यमा अल्फा अटोमोटिभले नेपाली बजारमा रोयल इन्फिल्डका बाइक बिक्री गरिरहेको छ । तर पनि कुनै पनि मोटरसाइकलमा कुनै पनि गुनासो नआएको गुलेरियाले बताए ।

रोयल इन्फिल्ड भारतमा समेत सबैभन्दा धेरै बिक्री हुने ब्रान्डमा पर्छ । गत आर्थिक वर्ष अर्थात सन् २०२४-२५ मा रोयल इन्फिल्डले पहिलो पटक १० लाख भन्दा बढी अर्थात १० लाख ९ हजार ९०० मोटरसाइकल बिक्री गरेर रेकर्ड कायम ग-यो ।

आर्थिक वर्ष २०२४–२५ मा रोयल इन्फिल्डले भारतिय बजरमा ९ लाख २ हजार ७५७ युनिट बिक्री गरेको छ भने निर्यात समेत ३७ प्रतिशतले बढाएर १ लाख ७ हजार १४३ युनिट पुर्याएको छ । जवकी गत आर्थिक वर्षमा कम्पनीले भारतमा ८ लाख ३४ हजार ७९५ युनिट मोटरसाइकल बिक्री गरेको थियो ।

यसरी निर्यात हुने मोटरसाइकल बजारमा नेपाल अग्रणी मानिन्छ । यसरी निर्यात हुने मोटरसाइकल मध्ये नेपालमा १० प्रतिशत भन्दा बढी मोटरसाइकल बिक्री भएका छन् । गत वर्ष करिव १० हजार मोटरसाइकल बिक्री भएकोमा यो वर्ष अझै बढ्ने निश्चित भइसकेको छ । सानो देश भएर पनि नेपालमा यसरी रोयल इन्फिल्डले एउटा राम्रो बजार निर्माण गरेको छ ।

रोयल इन्फिल्डका मोटरसाइकलको गुणस्तरीयता र पर्फमेन्स लगायतका फिचरले धेरैलाई लोभ्याउँछ । यो सबैलाई थाहा भएकै कुरा हो । तर यसरी सबैतिर रोयल इन्फिल्डको दबदबा कायम हुनुमा विशेषतः तीन कुराले भूमिका खेलेको गुलेरियाको भनाइ छ । ती तीन कुरा हुन् – कम्युनिटी, कल्चर र क्राफ्ट । नेपालमा भएका धेरै राइड कम्युनिटीहरुले यसमा महत्वपूर्ण भूमिका निभाएका छन् । समय समयमा विभिन्न स्थानमा घुम्ने, रमाउने र पर्यटन प्रवर्धन गर्ने कल्चर तथा मोटरसाइकल जुनसुकै स्थानमा पनि पुग्न सक्ने क्षमताका कारण यसैमा सवार हुन रुचाउने युवा र अन्य सबै उमेर समूहका व्यक्तिहरुको चाहना भएको पाइन्छ ।

नेपाली टु ह्विलर बजार अलि सुस्ताएको मानिन्छ । तर पनि यो समयमा समेत अल्फा अटोमोटिभले राम्रो संख्यामा मोटरसाइकल बिक्री गर्न सफल भएको छ । यसमा मोटरसाइकलको गुणस्तरीयता र बिक्री पछिको सेवा लगायतले महत्वपूर्ण भूमिका खेलेको मान्न सकिन्छ ।