केटिएम २५० एड्भेन्चरको २०२५ मोडलमा यी ४ फिचर अपग्रेड हुँदै

केटिएमले आफ्नो लोकप्रिय मोटरसाइकल २५० एड्भेन्चरको २०२५ मोडल लन्च गर्ने तयारीलाई अन्तिम चरणमा पुर्याएको छ । हालै सार्बजनिक गरिएको केही विवरण अनुसार यस नयाँ मोडलमा केटिएमले विशेषतः चारवटा फिचरलाई अपग्रेड गर्न लागेको देखिन्छ ।

२०२५ केटिएम २५० एड्भेन्चरमा अब १४ लिटरको इन्धन ट्याङ्की, ५ इन्चको डिजिटल इन्स्ट्रुमेन्ट कन्सोल, राइड–बाई–वायर र बाई–डाइरेक्सनल क्विक सिफ्टर पाइनेछ ।

लुक्स, डिजाइन र अन्य आधारभुत फिचरहरु केटिएम ३९० एड्भेन्चरसंग मेल खाने कम्पनीले जनाएको छ । यसमा अगाडिको अपसाइड–डाउन फोर्कद्वारा सस्पेन्ड गरिएको स्टिल ट्रेलिस फ्रेम र पछाडि एड्जस्टेवल मोनो–शक रहनेछ ।

सो मोटरसाइकल २५० ड्युक जस्तै २४८ सीसी, सिंगल–सिलिन्डर इन्जिनद्वारा संचालित हुनेछ । यसले ३० बीएचपी र २४ एनएम टर्क उत्पादन गर्छ भने इन्जिन ६ स्पीड गियरबक्ससँग जोडिएको छ ।

बाइकको अगाडि ३२० एमएम डिस्क र पछाडि २४० एमएम डिस्क ब्रेक जडान गरिएको छ भने स्विच गर्न मिल्ने डुअल च्यानल एबिएस उपलब्ध गराइएको छ । यस बाइकको अगाडि १९ इन्चको रिम र पछाडि १७ इन्चको एलोई ह्विल राखिएको छ ।