एउटै मोडलमा निर्भर यी ईभी ब्रान्ड, कुनको मूल्य कति ?

काठमाडौं– नेपाली अटो बजारमा नयाँनयाँ ब्रान्डका ईभी भित्रिने क्रम जारी छ । यसरी भित्रिने नयाँ ब्रान्डमा चिनियाँ ईभीको वर्चश्व कायमै छ । गत वर्षमात्रै एक दर्जन बढी नयाँ ब्रान्ड भित्रिएकोमा धेरैजसो कम्पनीले एउटा मात्रै मोडल आयात गरी बिक्री गर्दै आएका छन् ।

बजारमा अहिले नामी, एक्सपेङ ओमाडा, जेइको, लिप मोटर, अबतार, जिकर, रिडारा, जेएमईभी र वुलिङसँग एउटा मात्रै मोडल उपलब्ध छ । यी ब्रान्डले तत्कालै आफ्नो लाइनअप विस्तार गर्ने संभावना समेत निकै न्यून छ ।

सिजी मोटर्सले नेपाल ल्याएको एक्सपेङ, अवतार, दायुन, स्मार्ट र रिडारासंग अर्को मोडलको बिकल्प छैन । कम्पनीले एक्सपेङको जी६, अवतार–११, दायुन युहु र रिडारा आरडी६ मोडल बिक्री गर्दै आएको हो । यी ईभीको मूल्य क्रमशः ८५ लाख, १ करोड ४५ लाख, ३१ लाख र ६५ लाख रुपैयाँ निर्धारण गरिएको छ । सिजी मोटर्सले बिक्री गर्ने नेटा र स्मार्टसँग भने दुईवटा मोडलको बिकल्प पाइन्छ ।

यसैगरी, एमएडब्लु ग्रुपले बिक्री गर्ने नामीको पनि एउटामात्रै मोडल उपलब्ध छ । कुल तीन भेरिएन्टमा उपलब्ध यस ह्याचब्याक ईभीको मुल्य भेरिएन्टअनुसार ३० लाख २४ हजारदेखी ३६ लाखसम्म पर्छ । यो ग्रुपले बिक्री गर्ने दिपलसँग तीनवटा मोडल उपलब्ध छ भने सेरेससँग दुईवटा मोडल छ ।

सारडा ग्रुपले नेपाल ल्याएको तीनवटै ब्रान्डले एउटामात्रै मोडल बिक्री गर्दै आएको छ । कम्पनीले बिक्री गर्ने ओमोडासँग ई–५, जेइकोसँग जे६ र जिकरसँग एक्स मोडल बाहेक अन्य बिकल्प छैन । यी मध्ये ओमोडा ई–५ दुई भेरिएन्टमा उपलब्ध छ र यसको मुल्य ५६ लाख र ६२ लाख रुपैयाँ पर्छ । यसैगरी, जेइको जे–६ को ७० लाख पर्छ भने दुई भेरिएन्टमा उपलब्ध जीकर एक्सको ८५ लाख र १ करोड ५४ लाख रुपैयाँ तोकिएको छ ।

सांग्रिला मोटर्सले ल्याएको लिप मोटर्ससँग पनि एउटा मात्रै मोडल उपलब्ध छ । कम्पनीले ल्याएको सी–१० ईभीको मूल्य ६८ लाख रुपैयाँ निर्धारण गरिएको छ । जगदम्बा मोटर्सले ल्याएको जेएमईभी जेएसईको मुल्य ५४ लाख तोकिएको छ भने पारामाउन्ट मोटर्सले बिक्री गर्ने वुलिङ विंगोलाई ३२ लाख पर्छ ।

नेपाली बजारमा बिक्री हुने ईभीमा बीवाईडीसँग सबैभन्दा धेरै प्रोडक्ट लाइनअप छ । बीवाईडीले सील, एट्टो३, डल्फिन, ई६ र एम६ गरी कुल ५ वटा मोडल बिक्री गर्दै आएको छ । यसैगरी, टाटाले नेक्सन, पन्च, टियागो र टिगोर मोडल बिक्री गर्दै आएको छ भने एमजीले जेडएस, एमजी४ र कोमेट तथा दिपलले एस०७, एल०७ र ई०७ उपलब्ध गराउँदै आएको छ । हुन्डाईले कोना र आयोनिक–५ बिक्री गर्दै आएकोमा कियाले ईभी६ र ईभी९ मोडल बेच्दै आएको छ ।