फुल चार्जमा १५३ किलोमिटरको रेन्ज र ३५ लिटर स्टोरेज क्षमता भएको बजाज चेतक ३५ सिरिज लन्च

बजाज अटोले भारतीय बजारमा आफ्नो लोकप्रिय इलेक्ट्रिक स्कुटरको नयाँ पुस्ताको मोडल लन्च गरेको छ । कम्पनीले कस्मेटिक परिवर्तन र मेकानिकल अपग्रेडसहित अपडेटेड चेतक नयाँ ३५ सिरिज ल्याएको छ ।

अपडेटेड बजाज चेतकमा नयाँ च्यासिस फ्रेम प्रयोग गरिएको छ, जसमा ब्याट्री प्याक फ्लोरबोर्ड मुनि राखिएको छ। साथै अब सो स्कुटरमा ३५ लिटर अन्डर सिट स्पेस छ । चेतक ३५ सिरिजलाई पूर्ण रूपमा नयाँ प्लेटफर्ममा ल्याइएको छ । यसमा अब ३.५ किलोवाटको ठुलो ब्याट्री प्याक दिइएको छ। नयाँ इलेक्ट्रिक स्कुटरले फुल चार्जमा १५३ किलोमिटरको रेन्ज दिने कम्पनीको दाबी छ ।

सो स्कुटरले एकपटक फुल चार्ज गरेपछि १५३ किलोमिटरको आईडीसी प्रमाणित रेन्ज र १२०-१२५ किलोमिटरको वास्तविक रेन्ज पाउने कम्पनीको दाबी छ। ९५० वाटको चार्जरको मद्दतले ३ घण्टा २५ मिनेटमा ८० प्रतिशत चार्ज हुन्छ । बजाज अटोले नयाँ चेतक ३५ सिरिजको टप स्पिड ७३ किलोमिटर प्रतिघण्टा रहेको दाबी गरेको छ । यसमा इको र स्पोर्ट्स मोड दुवै रहेको छ।

कम्पनीले नयाँ चेतक स्कुटर पुरानो मोडलसँग मिल्दोजुल्दो भए पनि यसमा प्राविधिक रूपमा धेरै परिवर्तन गरिएको जनाएको छ । स्कुटरको प्लेटफर्म पनि परिवर्तन गरिएको छ । नयाँ प्लेटफर्ममा कन्ट्रोल सिस्टम, मोटर प्यानल, ब्याट्रीको स्थिति र यसको संरचना पनि परिवर्तन गरिएको छ।

नयाँ बजाज चेतक ३५ सिरिज ई-स्कुटरमा फ्रन्ट एलईडी डीआरएल, क्रोम एलिमेन्टसहितको रेट्रो शैलीको डिजाइन र स्लोपिङ टेल सेक्शन रहेको छ। यसमा रंगीन टीएफटी डिस्प्ले दिइएको छ, जसमा टर्न-बाई-टर्न नेभिगेसन, कल कन्ट्रोल र म्युजिक म्यानेजम्नेट जस्ता सुविधा रहेको छ । साथै चेतक ३५ सिरिजमा कल अटेन्डिङ, म्युजिक कन्ट्रोल र डिस्प्लेमा रियल टाइम नोटिफिकेशन जस्ता सुविधा पनि उपलब्ध गराइएको छ । ३५ सिरिजमा अन्य भेरिएन्टको तुलनामा ८० एमएम लामो सीट छ । यसको ह्विलबेस पनि २५ एमएमले बढेर १,३५० एमएम पुगेको छ ।

नयाँ बजाज चेतक चेतक ३५०२ र चेतक ३५०१  गरी दुई भेरिएन्टमा लन्च गरिएको छ । नयाँ बजाज चेतक ३५ भारतीय बजारमा टीभीएस आईक्युब, एथर रिज्टा, भीडा भीटु र ओला एसवन जस्ता इलेक्ट्रिक स्कुटरसँग प्रतिस्पर्धा गर्नेछ ।