महिन्द्राको दुई उत्कृष्ट इलेक्ट्रिक एसयूभी एक्सईभी ९ई र बीई ६ई लन्च, यस्तो छ फिचर

महिन्द्राले अनलिमिटेड इन्डिया इभेन्टमा भारत र विश्व बजारका एक्सईभी ९ई र बीई ६ई लन्च गरेको छ । साथै कम्पनीले यसको मूल्य पनि खुलासा गरेको छ । इलेक्ट्रिक कारको बढ्दो मागको बिचमा महिन्द्राले यी दुबै इलेक्ट्रिक एसयूभीको साथमा आफ्नो छाप छोड्न तयार छ ।

महिन्द्राको नयाँ फ्ल्यागशिप इलेक्ट्रिक एसयूभी बीई ६ई को मूल्य १८ लाख ९० हजार र एक्सईभी ९ई को मूल्य २१ लाख ९० हजार भारुबाट सुरु हुन्छ। यी दुवै इलेक्ट्रिक एसयूभीको डेलिभरी सन् २०२५ को फेब्रुअरीबाट सुरु हुनेछ ।

कम्पनीले यी दुबै एसयूभीमा आकर्षक लुक र डिजाइनका साथै भरिपूर्ण फिचरले सुसज्जित गरेको छ । एक्सईभी ९ई मा ४३ इन्चको ट्रिपल स्क्रिन सेटअप दिइएको छ, जसमा यात्रु, चालक र सेन्ट्रल इन्फोटेनमेन्ट प्रदान गरिएको छ । यसलाई एकसाथ सिङ्क गरी थिएटर मोडमा रूपान्तरण गर्न सकिन्छ । बीई ६ई मा १२.३ इन्चको ड्युअल स्क्रिन सेटअप दिइएको छ ।

सो एसयूभीमा ३६० डिग्री क्यामेरा, अटो एडजस्टिङ हेडअप डिस्प्ले भिजन, वायरलेस एन्ड्रोइड अटो र एप्पल कार प्ले, मल्टिपल ड्राइभ मोड, कनेक्टेड कार फिचर, ६ एयरब्याग, १६ मिलियन कलर विकल्पसहितको एम्बियन्ट लाइटिङ र एड्भान्स ड्राइभर असिस्टेन्ट समावेश छ ।

सो एसयूभी इङलो इलेक्ट्रिक ओरिजिन आर्किटेक्चरमा निर्माण गरिएको छ । एक्सईभी ९ई को लम्बाइ ४७८९ एमएम र ग्राउन्ड क्लियरेन्स २०७ एमएम छ। यसमा १९५ लिटरको फ्रन्ट स्पेस र ६६३ लिटरको बुट स्पेस रहेको छ । साथै बीई ६ई को लम्बाइ ४३७१ एमएम र ४५५ लिटर बुट स्पेस छ तथा फ्रन्टमा ४५ लिटर स्पेस रहेको छ ।

महिन्द्रा एक्सईभी ९ई मा स्लिक एरोडायनामिक कुपे एसयूभी डिजाइन दिइएको छ । यसमा बोल्ड त्रिकोणीय हेडल्याम्प सेटअप, फ्लेर्ड ह्विल आर्च, फराकिलो एलईडी लाइटबार र १९ इन्चको पाङ्ग्रा छ । साथै बीई ६ईमा इन्टिग्रेटेड इन्भर्टेड एल आकारको डीआरएल, २० इन्च अलोय ह्विललगायत अन्य सुविधा छ । महिन्द्राका यी दुवै एसयूभीहरू निकै उत्कृष्ट, स्टाइलिश र फ्यूचरिस्टिक देखिन्छ ।

कम्पनीले सो दुबै एसयूभीमा ५९ किलोवाट र ७९ किलोवाटसम्मको ब्याट्री प्याक उपलब्ध गराएको छ । यसमा एलएफपी केमिस्ट्री भएको ब्याट्रीहरू छन् जसलाई अल्ट्रा फास्ट चार्जिङले सपोर्ट गर्छ । यसलाई १७५ किलोवाटको चार्जरको मद्दतले २० मिनेटमा २० देखि ८० प्रतिशतसम्म चार्ज गर्न सकिन्छ।

एक्सईभी ९ई र बीई ६ई को ५९ किलोवाट ब्याट्री प्याकले २३१ एचपीको पावर उत्पादन गर्छ र ७९ किलोवाट ब्याट्री प्याकले २८६ एचपीको पावर र ३८० एमएमको टर्क जेनेरेट गर्छ । यी दुवै एसयूभीहरू ६.७ सेकेन्डमा ०-१०० किलोमिटर प्रतिघण्टाको गतिमा चलाउन सकिन्छ। बीई ६ई ले सिंगल चार्जमा ६८२ किलोमिटर र एक्सईभी ९ई ले सिंगल चार्जमा ६५६ किलोमिटर रेन्ज प्रदान गर्छ । महिन्द्राका यी दुवै इलेक्ट्रिक एसयूभीमा लाइफटाइम ब्याट्री वारेन्टी दिइएको छ ।