१ महिनामा २१ हजार बढी दिपल एस०५ बिक्री, नयाँ र अत्याधुनिक प्रबिधीका कारण चर्चित

दिपलले गत अक्टोवर २० मा लन्च गरेको नयाँ इलेक्ट्रिक एसयुभी एस०५ अहिले चिनियाँ बजारमा लोकप्रिय वनिरहेको छ । कम्पनीका अनुसार एक महिनाको अबधीमा सो नयाँ एसयुभीले २१ हजार ७३० यूनिट अर्डर पाएको छ ।

लन्च भएको सुरुवाती १० दिनमा १० हजार युनिट अर्डर पाएको यो एसयुभी अत्याधुनिक फिचरका कारण चर्चित बनेको हो । चांगन मातहतको ईभी ब्रान्ड दिपलले हाल उत्पादन गर्दै आएको गाडी संख्या अनुसार एस०५ लाई समयमै डेलिभरी दिनु चुनौतीपूर्ण हुने जनाइएको छ । गत अक्टोवरमा कुल २७ हजार ८६२ युनिटमात्र ईभी डेलिभरी दिन सकेको दिपलले एस०५ बाट मात्रै २१ हजार बढी अर्डर पाएपछि समयमै डेलिभरी दिनु चुनौतीपूर्ण बनेको हो ।

एस०५ मा दिपलले फोरके इन्टेलिजेन्ट क्यामेरा दिएको छ । उक्त क्यामेरमा ६४जी स्टोरेज स्पेस उपलब्ध छ र यसमा २१ हजार फोटोहरु वा १२ घण्टाको भिडियो स्टोर गर्न सकिन्छ । त्यसैगरी यसमा भएको हुवावे एक्सपिक्सेलको सहयोगले चल्ने १.३ मिलियन पिक्सेलको इन्टेलिजेन्ट हेडलाइटले १२० इन्चको स्क्रिन प्रोजेक्सन गर्न सक्छ ।

यसमा भएको प्रविधि पनि लोभ लाग्दो छ । यसमा एडेप्टिभ क्रुज कन्ट्रोल, लेन सेन्टरिङ कन्ट्रोल र इन्टेलिजेन्ट पार्किङ असिस्ट जस्ता एड्भान्स्ड ड्राइभिङ असिस्टेन्स फङसनको अनुभवका लागि पाँच वटा हाई डेफिनेसन क्यामेरा, पाँच एमएमका वेभ राडार र १२ अल्ट्रासोनिक राडार रहेका छन् । यसमा हाई स्ट्रेन्थ स्टिल आल्मुनियम बडी र ६ एयरब्याग रहेका छन् ।

यसको ईभी भेरिएन्टमा १७५ किलोवाट र ३२० एनएम रियर इलेक्ट्रिक मोटर रहेको छ, जसमा ५६.१२ किलोवाट आवरको लिथियम आइरन फस्फेट ब्याट्री रहेको छ । यसले सीएलटीसी रेन्ज ५१० किलोमिटर दिन्छ । सो ब्याट्री ३० देखि ८० प्रतिशत चार्ज हुन १५ मिनेट मात्र लाग्छ ।

कारको इन्टेरियरमा १५.४ इन्चको २.५के सेन्ट्रल कन्ट्रोल स्क्रिन रहेको छ । यसको स्टेयरिङ ह्विल ‘डी’ आकारको छ । यसमा दिपल ओएस ३.० प्रयोग गरिएको छ ।

नेपाली बजारमा हाल एमएडब्लु वृद्धिले दिपल एल०७ र एस०७ को बिक्री–वितरण गरिरहेको छ । आगामी दिनमा एस०५ पनि नेपाली बजारमा आउने सहजै अनुमान गर्न सकिन्छ ।