नासा नेपालले सम्पन्न ग-यो ‘अ सेफ जर्नी टु द स्कुल्स’ अभियान

काठमाडौं – नेपाल अटोमोबाइल्स एसोसिएसन (नासा नेपाल) ले स्टार रेटिङ फर स्कुल्स (एसआरफोरएस) सँग सम्बन्धित अभियान सफलतापूर्वक सम्पन्न गरेको छ । विद्यार्थीहरुका लागि सडक सुरक्षासँग सम्बन्धित ‘अ सेफ जर्नी टु द स्कुल्स’ को सो पहल काभ्रेको धुलिखेलस्थित सञ्जिवनी उच्च मावि र ललितपुरको भैसेपाटीस्थित आदर्श सौलः युवक माविका विद्यार्थीहरु माझ गरिएको थियो ।

भियतनामको एआईपी फाउन्डेसनद्वारा समर्थनप्राप्त सो अभियान यी स्कुल वरपरको सडक सुरक्षा पूर्वाधारमा सुधारमा केन्द्रित रहेको छ । यसबाट सञ्जिवनी उच्च माविमा प्रारम्भिक वान स्टार रिस्क लेभल देखि प्रभावपूर्ण ४.५ स्टार तथा श्री आदर्श सौलः युवक माविमा ४.२ स्टार सम्म सेफ्टी रेटिङमा वृद्धि भएको छ ।

प्रोजेक्ट को–अर्डिनेटर सुवाश भट्टराईका अनुसार सो अवसरमा ९३८ भन्दा बढी विद्यार्थीलाई सडक सुरक्षा तालिम प्रदान गरिनुका साथै २१ रोड सेफ्टी साइनबोर्ड, चार वटा जेब्राक्रसिङ, चार रम्बल स्ट्रिप्स र एउटा स्पिड बम्पका निर्माण गरिनुका साथै धुलिखेलमा ८४ मिटरको फुटपाथ र ललितपुरको फुटपाथमा १३२ मिटरको प्रोटेक्टिभ रेलिङ निर्माण गरिएको छ ।

विद्यार्थी र वरिपरिका समुदायका लागि सुरक्षित वातावरण निर्माण गरिनुका साथै लेन र एज मार्किङमार्फत ट्राफिक फ्लो र पेडेस्ट्रियन भिजिबिलिटी बढाउने कार्य भएको छ ।

नासा नेपालले सडक सुरक्षाका लागि आवश्यक कार्य गर्न निरन्तर रुपमा वकालत गर्ने र यस प्रकारको स्कुल सेफ्टी क्याम्पेन प्रदेशभर गर्नका लागि औपचारिक रुपमा यस सम्बन्धी प्रतिवेदन बागमती प्रदेश सरकारलाई हस्तान्तरण गर्ने बताएको छ ।

नासा नेपालले नेपालभरका विद्यार्थी र समुदायको सुरक्षित भविष्यका लागि योगदान गर्दै विद्यालयमा सुरक्षित यात्रालाई प्रवर्धन गर्न र रोड ट्राफिक रिस्कलाई घटाउनमा नासा नेपालले गरिरहेको पहललाई यसले देखाएको छ ।