भारतमा हरेक महिना ३० हजार भन्दा बढी युनिट बिक्री हुन्छ रोयल इन्फिल्डको यो मोटरसाइकल

रोयल इन्फिल्डले सेप्टेम्बर महिनामा भारतमा कुल ७९ हजार ३ सय २६ युनिट मोटरसाइकल बिक्री गरेको छ । यो अघिल्लो वर्षको सोही अवधिको तुलनामा ६.८२ प्रतिशतले बढी हो ।

यस वृद्धिमा रोयल इन्फिल्ड क्लासिक ३५० ले सबैभन्दा महत्वपूर्ण भूमिका खेलेको जनाइएको छ । उक्त महिना ३३ हजार ६५ युनिट बिक्री सहित कुल बिक्रीको ४३ प्रतिशत भन्दा बढी हिस्सा क्लासिक ३५० ले ओगटेको हो । यसैगरी सर्बाधिक बिक्री हुने ४ शिर्ष मोडलमा ३५० सिसी सेग्मेन्ट परेका छन् । जसले कुल बिक्रीमा ९० प्रतिशत योगदान पु-याएको छ ।

क्लासिक ३५० पछि दोस्रो धेरै बिक्री हुने मोडलमा हन्टर ३५० परेको छ । सेप्टेम्वरमा हन्टर ३५० १७ हजार ४०६ युनिट बिक्री भएको जनाइएको छ । यसैगरी, बुलेट ३५० १२ हजार ९०१, मेटिओर ३५० ८ हजार ६६५ युनिट र हिमालयन १ हजार ८१४ युनिट बिक्री भएका छन् ।

भारतमा जस्तै नेपालमा पनि क्लासिक ३५० रोयल इन्फिल्डको वेस्ट सेलिङ मोडलका रुपमा परिचित छ ।