पेरिस मोटर शोमा पानीमा तैरिने कार देखि विश्वकै पहिलो एआई प्रयोग भएको कार सम्म प्रदर्शन

पेरिस अटो शो २०२४ आयोजना भइरहेको छ । उक्त शोमा यस्तो उच्च प्रविधिले सुसज्जित नयाँ कार लन्च गरिएको छ, जुन पानीमा तैरने, चीलले जस्तै टाढाको खतरा महसुस गर्न सक्ने र ३६० डिग्री घुमाउन सकिन्छ । युरोपको चर्चित अटो शोमा ५० कम्पनीले आ–आफ्ना कार प्रदर्शन गरिरहेका छन् । चीनको एक्सपेङगले यस मोटर शोमा पी७प्लस सेडान ईभी लन्च गरेको छ । यो संसारको पहिलो आर्टिफिसियल इन्टेलिजेन्स कार हो । चीनले पेरिस मोटर शोमा विश्वसामु दुई ठुला कार प्रस्तुत गरेको छ ।

चीनको एक्सपेङग पी७प्लस सेडान ईभीको सबैभन्दा ठुलो विशेषता भनेको ईगल आई भिजन हो, जुन साधारण क्यामेराको तुलनामा धेरै सटीकताका साथ लामो दूरीको जानकारी प्रदान गर्न सक्षम छ । सो कारमा जडान गरिएको क्यामेराले २ वटा फुटबल मैदानको दूरी बराबरको क्षेत्र समेट्न सक्छ । यस्तो अवस्थामा सो कारले चालकलाई जामलगायतका सबै खतराबारे सचेत गराउँछ ।

सो गाडीमा ६०.७ किलोवाट र ७६.३ किलोवाट क्षमताको दुई वटा ब्याट्री प्याक दिइएको छ, जसले ६२० देखि ७१० किलोमिटरको रेन्ज प्रदान गर्छ ।

चिनियाँ कार निर्माता कम्पनी बीवाईडीले याङवाङ यू८ प्लगइन हाइब्रिड एसयूभी पनि ल्याएको छ । सो कारको सबैभन्दा ठुलो विशेषता भनेको यो पानीमा तैरिन सक्छ । यदि कुनै कारणले सो कार बाढीमा फस्यो भने, यो ३० मिनेटसम्म तैरिन सक्छ। यसबाहेक, यसले साइडवे पार्किङलाई पनि सजिलो बनाउँछ । सो कारमा स्याटेलाइट फोन र टाढाका वस्तु पत्ता लगाउन ड्रोन पनि जडान गरिएको छ ।

यसका साथै यस मोटर शोमा अन्य धेरै उत्कृष्ट कारहरू पनि प्रस्तुत गरिएको छ, जसले कार प्रेमीहरूलाई आफ्ना विभिन्न विशेषताहरूले मोहित पारेको छ ।