अक्टोबर ४ मा लन्च हुँदै निसान म्याग्नाइट फेसलिफ्ट

निसानले भारतीय बजारमा इन्ट्री लेभल एसयूभी सेगमेन्टमा म्याग्नाइटको फेसलिफ्ट संस्करण लन्च गर्ने तयारी गरिरहेको छ । कम्पनीले सो एसयूभीको बुकिङ पनि सुरु गरिसकेको छ । सो एसयूभीको बुकिङ डिलरशिपमा अफलाइन र वेबसाइटमा अनलाइन गर्न सकिन्छ ।

मिडिया रिपोर्टका अनुसार निसान म्याग्नाइटको फेसलिफ्ट संस्करणमा धेरै कस्मेटिक परिवर्तन गरिएको छ, यद्यपि कम्पनीले यसको बारेमा कुनै आधिकारिक जानकारी दिएको छैन ।

रिपोर्टका अनुसार यसको इन्जिनमा परिवर्तन हुने सम्भावना कम छ । यसको अगाडिको बम्पर, हेडलाइट, टेललाइट र ग्रिल परिवर्तन हुनेछ साथै पछाडिको बम्पर र अलोय ह्विलमा पनि परिवर्तन गरी यसलाई नयाँ रुप दिने सम्भावना छ । सो एसयूभीको इन्टेरियर पनि परिवर्तन हुनेछ ।

कम्पनीले सो एसयूभी लन्च गर्नुअघि सामाजिक सञ्जालमा यसको टिजर सार्वजनिक गरेको छ, जसमा यसको फिचरको बारेमा जानकारी दिइएको छ । यसको फेसलिफ्ट संस्करणमा २० भन्दा बढी फस्ट सेगमेन्ट फिचरका साथै ५५ भन्दा बढी सेफ्टी फिचर प्रदान गरिनेछ । 

नयाँ म्याग्नाइट निसानले इन्ट्री लेभल एसयूभी सेगमेन्टमा टाटा पञ्च, रेनो किगर, सिट्रोन बसाल्ट, टोयोटा टेसर, मारुती फ्रन्क्स, महिन्द्रा एक्सयूभी ३एक्सओ जस्ता एसयूभीसँग प्रतिस्पर्धा गर्नेछ ।

कम्पनीले यसको फेसलिफ्ट संस्करण अक्टोबर ४ मा भारतीय बजारमा लन्च गर्नेछ । यसको मूल्य ६ लाख भारुदेखि सुरु हुनेछ तर फेसलिफ्ट भर्सनको मूल्य ४० देखि ५० हजार भारुसम्म बढाउन सकिनेछ । सो एसयूभीको डेलिभरी अक्टोबर ५ बाट सुरु हुनेछ ।