बीवाईडीको एसेम्वल प्लान्ट अव पाकिस्तानमा पनि, ईभी बजारको ठूलो हिस्सा कब्जा गर्ने योजना

न्यू इनर्जी भेइकलमा कहलिएको ब्राण्ड बीवाईडीले पाकिस्तानमा समेत आफ्नो नयाँ प्लान्ट स्थापना गर्ने भएको छ । मिडिया रिपोर्टका अनुसार बीवाइडीले पाकिस्तानको ईभी बजारको ठूलो हिस्सा कब्जा गर्ने योजना बनाएको छ ।

स्थानीय साझेदारसँग पाकिस्तानको कराँचीमा नयाँ कारखाना निर्माण गर्ने योजना बनाएको बीवाइडीले सुरुमा ३ वटा मोडल लन्च गर्ने तयारी थालेको हो । जसमा सेडान र एसयूभी मोडल सामेल हुने टुंगो लागिसकेको छ । कम्पनीले भविषयमा ब्याट्री–इलेक्ट्रिक को साथै प्लग–इन हाइब्रिड लगायत अन्य थप मोडलहरू समेत उत्पादन गर्ने योजना बनाएको छ ।

बीवाइडीले पाकिस्तानको सबैभन्दा ठूलो व्यापार समूह मेगा कंग्लोमेरेटसंग यसबारे सम्झौता गरेको छ । यो समहु अन्तर्गतको हव पावर्स कम्पनी पाकिस्तानको सबैभन्दा ठूलो स्वतन्त्र विजुली उत्पादक कम्पनी समेत हो ।

नयाँ कारखाना कराँचीको पोर्ट कासिम क्षेत्र नजिकै स्थापना गरिने मिडिया रिपोर्टमा उल्लेख रिएको छ । जहाँ टोयोटा, सुजुकी र किया जस्ता अन्य ब्रान्डले समेत एसेम्बली प्लान्ट स्थापना गरेका छन् । बीवाईडीको नयाँ प्लान्ट २०२६ को पहिलो हाफतिर सञ्चालनमा आउने जनाइएको छ ।

उक्त प्लान्टबाट गाडी उत्पादन थाल्नु अघि कम्पनीले यस वर्षको चौथो त्रैमासिकमा बीवाईडीलाई पाकिस्तानमा बिक्री सुरु गर्ने तयारी थालेको छ । पाकिस्तानमा यसअघि ग्रेट वाल मोटर्स, एसएआईसी र चोङकिङ चाङ्गन अटोमोबाइलले गाडी एसेम्वल गर्दै आएका छन् ।