पेट्रोल कारको तुलनामा विद्युतीय कारको टायर किन छिटो खराब हुन्छ ?

विश्वभर विद्युतीय कारको प्रयोग तिब्र गतिमा बढिरहेको छ । कार्बन उत्सर्जन नगर्ने, संचालन खर्च ज्यादै न्यून पर्ने र प्रयोग गर्न सजिलो हुनेजस्ता कारणले संसारका धेरै मानिसले ईभीलाई अपनाउन थालेका छन् । विद्युतीय कारका धेरै फाइदाहरु भएपनि केहि यस्ता कुराहरु पनि छन्, जसले उनीहरुलाई पेट्रोल कार भन्दा महँगो बनाउँछ ।

चार्जिङ पूर्बाधार र रेन्ज एन्जाईटी ईभीमा देखिने प्रमुख समस्या हुन् । यसको अलवा विद्युतीय गाडीको टायर छिट्टै खिईने समस्याका कारण यसलाई चाँडो परिवर्तन गर्नुपर्ने हुन्छ । वास्तवमै, पेट्रोल वा डिजेल कारको तुलनामा इलेक्ट्रिक कारको टायर चाँडो खिइन्छ ।

पेट्रोल कारको टायर औषतमा ४० हजार किलोमिटर गुडेपछि फेर्नुपर्छ भने विद्युतीय कारको टायर ३० हजार किलोमिटरमै फेर्नुपर्ने विभिन्न अध्यायनले देखाएको छ । टायर छिट्टै खिइनुको कारण कतै यस्ता गाडीमा प्रयोग हुने टायर कमसल गुणस्तरको भएर त हैन ? भन्ने आशंका समेत उब्जिन सक्छ । तर वास्तवमा यस्तो भने होइन ।

विद्युतीय कारको टायरमा कम्पनीले कुनै सम्झौता गर्दैन । यसको गुणस्तर पनि पेट्रोल कारमा पाइने टायर जस्तै हुन्छ । अझ धेरैजसो टायर उत्पादकले त ईभी डेडिकेटेड टायर नै ल्याइसकेका छन् ।

ईभीमा प्रयोग हुने टायर टायर चाँडो खिइनुको कारण इलेक्ट्रिक कारको तौल हो । धेरैलाई थाहा नहुन सक्छ कि विद्युतीय कारको तौल पेट्रोल कारको भन्दा बढी हुन्छ । यस्ता कारमा प्रयोग हुने ब्याट्री निकै भारी हुने हुँदा कारको तौल पनि बढि हुन गएको हो ।

भारी तौलका कारण विद्युतीय कारको टायर चाँडै बिग्रन्छ । अझ बाटोको अवस्था राम्रो छैन भने त झन् छोटो समयमै टायर काम नलाग्ने हुन्छ । साथै यस्ता गाडीको टर्क उच्च हुने कारण पनि टायर छिट्टै खिइन्छ । मोटरले ह्विललाई छिटो घुमाउने हुँदा यसले जमिनको सतहसंग टायरको घर्षण बढाउँछ र टायर छिट्टै विगार्छ ।