अपडेटसहित आउँदै न्यु जेनेरेसन बजाज डोमिनार ४००

बजाजले नयाँ जेनेरेसन डोमिनार ४०० लाई भारतमा ठूलो अपग्रेडका साथ प्रस्तुत गर्ने योजना बनाएको छ । हाल सो बाइकमा काम भइरहेको छ । मिडिया रिपोर्टका अनुसार बजाज डोमिनार ४०० सम्भवतः नयाँ प्लेटफर्ममा आधारित हुनेछ।

हालको डोमिनार ४०० केटीएम बाइकमा आधारित छ । सो मोटरसाइकलले भारतीय बजारमा राम्रो प्रदर्शन गरेको छ । बजाज डोमिनार लामो दूरीको यात्राका लागि उपयुक्त भए तापनि बाइकको तौलका कारण दैनिक आवतजावतमा चुनौतीपूर्ण हुने गरेको छ ।

डोमिनार ४०० को कर्ब वजन १९३ किलोग्राम छ । त्यसैले पनि आगामी बजाज डोमिनार नयाँ प्लेटफर्ममा निर्माण हुने अनुमान गरिएको छ । सो बाइकमा पनि ३७३ सीसी सिंगल सिलिन्डर लिक्विड कुल्ड इन्जिन प्रयोग गरिने छ, जसले अधिकतम ३९.५ बीएचपी पावर र ३५ एनएमको टर्क जेनेरेट गर्छ। यसको इन्जिन ६ स्पिड म्यानुअल गियरबक्ससँग जोडिएको छ ।

नयाँ डोमिनारमा नयाँ अलोय ह्विल र बक्स-टाइप स्विङआर्म पाउने अपेक्षा गरिएको छ । कम्पनीले बाइकको तौल घटाउने सम्भावना छ । नयाँ बजाज डोमिनार ४०० मा ब्लुटुथ कनेक्टिभिटी, टर्न-बाई-टर्न नेभिगेसन, राइड-बाई-वायर थ्रोटल, मल्टिपल राइड मोड र स्विच गर्न मिल्ने ट्रयाक्सन कन्ट्रोलका साथमा डिजिटल टीएफटी इन्स्ट्रयुमेन्ट क्लस्टर पाउने अपेक्षा गरिएको छ ।

नयाँ पुस्ताको बजाज डोमिनार ४०० ले लन्च पछि भारतीय बजारमा ट्रायम्फ स्पिड ४०० र हिरो माभेरिक ४०० सँग प्रतिस्पर्धा गर्नेछ।