तीव्र रुपमा तयार हुँदै ग्वार्को फ्लाइओभर

काठमाडौं – राजधानीको चक्रपथस्थित ग्वार्कोमा निर्माण भइरहेको फ्लाइओभर निर्माणको कार्य तीव्र रुपमा भइरहेको छ । हाल आठ लेन मध्ये चार लेन बन्द गरेर यहाँ निर्माण कार्य भइरहेको छ ।

यस अनुसार एप्रोच सडक र आइरल वालको काम भइरहेको छ । सडक विभागले असारभित्रै निर्माण सकेर ०८१ भित्रै सवारीसाधन गुडाउने लक्ष्य लिएको छ ।

निर्माण कम्पनी आशिष–समानान्तर–रेगिलर जेभीका अनुसार बिहान ७ बजेदेखि राति ११ बजेसम्म काम भइरहेको छ । ग्वार्को चोकमा फ्लाइओभर बनेपछि चक्रपथको कलंकी–कोटेश्वर सडक खण्डमा चल्ने सवारीसाधन फ्लाइओभरबाट र ग्वार्को–लामाटार–ग्वार्को–पाटनतर्फ चल्ने सवारीसाधन ओभरपासको सडक खण्डबाट गुड्नेछन् । फ्लाइओभर १७ करोड ६ लाख लागतमा निर्माण भइरहेको छ ।

दुई वर्षभित्र फ्लाइओभर बनाउन १२ फागुन ०७८ मा सम्झौता भएको थियो । तर, पछि डिजाइनमा त्रुटि पाइएपछि १० भदौ ०८० मा संशोधन गरियो । जसकारण आयोजनाको काम एक वर्ष धकेलियो । ०८१ फागुनसम्म निर्माण सक्नुपर्ने सम्झौता छ ।