कार रोक्न पहिले क्लच थिच्ने कि ब्रेक? जान्नुहोस्

कार चलाउनु र ड्राइभिङ कलामा निपुण हुनु दुई फरक कुरा हुन्। ड्राइभिङ स्कुलमा कार ड्राइभिङ सजिलैसँग सिक्न सकिन्छ, तर ड्राइभिङ स्कुलमा कार चलाउन सिक्दैमा कारको जटिलता बुझ्न सकिन्छ भन्ने हुँदैन । यही कारणले गर्दा कार राम्ररी चलाउन नसक्दा माइलेज घट्छ, गाडीको इन्जिनमा लोड पनि बढ्छ र धेरै पार्ट्स छिट्टै बिग्रन थाल्छ ।

कार चलाउँदा पहिले एक्सिलरेटर, ब्रेक र क्लचको बारेमा राम्ररी बुझ्नु पर्छ । कार चलाउन यी तीन वटैलाई मिलाएर काम गर्नुपर्छ । तर सबैलाई ब्रेक र क्लचको सही प्रयोग थाहा हुँदैन । कार रोक्न पहिले क्लच वा ब्रेक मध्ये कुन थिच्नु पर्छ भन्ने प्रश्नमा अधिकांशको जवाफ सायद पहिले क्लच हुन्छ, तर यो पूर्णतया सही होइन । कारको गति अनुसार क्लच र ब्रेकको प्रयोग फरक–फरक हुन्छ ।

हाइवेमा ड्राइभ गर्दा गाडी रोक्न आवश्यक परेमा पहिले एक्सिलरेटरबाट आफ्नो खुट्टा हटाउनुपर्छ र ब्रेक लगाउनुपर्छ। यहाँ क्लच पछि प्रयोग गरिन्छ। गाडी रोकिने बेलामा मात्र क्लच थिच्नुपर्छ ।

ट्राफिकमा ड्राइभ गर्दा र कारको गति धेरै उच्च छैन भने यस्तो अवस्थामा पहिले ब्रेक लगाए गाडी एक्कासि रोकिन सक्छ । तसर्थ, ट्राफिकमा गाडी चलाउँदा पहिले क्लच थिच्नु आवश्यक छ।

गाडीको गतिलाई मात्र कम गर्नु छ भने गियर परिवर्तन गर्न आवश्यक नभएसम्म क्लच प्याडलको कुनै आवश्यक पर्दैन । यस्तो अवस्थामा एक्सिलरेटर छोड्नुपर्छ र आवश्यक भए ब्रेक लगाउनुपर्छ ।

आपत्कालीन अवस्थामा अचानक ब्रेक लगाउन चालकले क्लच र ब्रेक एकैसाथ थिच्नु पर्छ। यसो गर्दा गाडी तुरुन्तै रोकिन्छ।