नयाँ ड्यूक ३९० को बिक्री सुरु, पहिलो दिनमै ५० वटा बाइक हस्तान्तरण

काठमाडौं–केटिएम ३९० ड्यूकको थर्ड जेनेरेशन नेपाली बजारमा लन्च भएको छ । मंगलबार एक कार्यक्रमको आयोजना गरी आधिकारिक वितरक हंसराज हुलासचन्द एण्ड कम्पनीले नयाँ ड्यूक ३९० को बिक्री सुरु गरेको हो । बाइकको मूल्य ८ लाख ९९ हजार ९०० रुपैयाँ निर्धारण गरिएको छ । जुन पुरानो मोडलभन्दा १ लाख सस्तो हो । बाइक लन्च भएको पहिलो दिनमै ५० जना ग्राहकलाई हस्तान्तरण गरिएको छ ।

पावर, स्टाइल र इनोभेशनमा नयाँ बेञ्चमार्क स्थापना गर्दै नयाँ अपग्रेड र उत्कृष्ट फिचर्सहरुको साथ नयाँ ड्यूक ३९० नेपाली बजारमा प्रवेश गरेको कम्पनीले जनएको छ । बाइकमा अपग्रेडेड ३९९ सिसी सिङ्गल सिलिन्डर लिक्वीड कुल्ड इन्जिन रहेको छ, जसले ८५०० आरपिएममा उच्चतम ४६ पिएस पावर र ६५०० आरपिएममा उच्चतम ३९ एनएम टर्क जेनेरेट गर्दछ ।

यसमा ६ स्पीड गियर बक्सको साथै स्लिपर क्लच र क्विक सिफ्टर दिइएको छ । जसका कारण सजिलैसँग बिना कठिनाई गियर बदल्न मद्दत मिल्नेछ ।

विगतका मोडलहरुको तुलनामा नयाँ ड्यूक ३९० मा ठूलो फ्युल ट्यांक, स्प्लीट सिट, स्टिल ट्रेलीस फ्रेम, डाइ–काष्ट आल्मुनियम सबफ्रेम, एडजस्टेबल सिट हाइट, तिनवटा राइडिङ्ग मोड (स्ट्रिट, रेन र ट्रयाक), लञ्च कन्ट्रोल, स्मार्टफोन कनेक्सन र टर्न–बाइ–टर्न न्याभीगेशन सहितको ५ इन्चको टिएफटि इन्सट्रुमेन्ट क्लस्टर, ४३ एमएमको अपसाइड–डाउन फर्कस् र अफसेट मोनो–शक, डुअल च्यानल एबिएस., कर्नरिङ एबिएस र सुपर मोटो एबिएस. जस्ता विशेषताहरू समावेश गरिएको छ ।

हंसराज हुलासचन्द एण्ड कम्पनीका सहायक महाप्रबन्धक बिजय श्रेष्ठका अनुसार नयाँ जेनेरेशनको ड्यूक नेपाली बजारमा सार्वजनिक भएसँगै यसले नेपालका मोटरसाइकल पारखीहरुका लागि नयाँ अनुभव प्रदान गर्नेछ । यो नयाँ बाइक प्रि वुक गर्ने ग्राहकले ३१ हजार पर्ने एरोह हेल्मेट निशूल्क पाउने बताइएको छ । बाइकलाई केटिएमको नेपालभर संचालनमा रहेका सोरुमबाट बुकिङ गर्न सकिनेछ ।