आयो एसी हेलमेट, गर्मीमा बाइकरको लागि वरदान

बाइक राइडर र ट्राफिकमा घण्टौं घाममा उभिनेहरूका लागि हैदरावादको जर्स सेफ्टी नामक कम्पनीले एसी जडित हेलमेट लन्च गरेको छ । यतिखेर सो एसी हेल्मेटको निकै चर्चा चलिरहेको छ ।

सो एसी हेलमेटमा १० घण्टासम्म चल्ने सक्ने ब्याट्री जडान गरिएको छ । साथै हेलमेटको सेफ्टीमा पनि विशेष ध्यान दिइएको छ । एसी हेल्मेटको मूल्य १३ हजारदेखि १७ हजार भारु बिच तोकिएको छ । साे हेलमेटकाे ताैल ६५० ग्राम छ ।

सो एसी हेल्मेटमा २०० ग्रामको एयर कन्डिसनर जडान गरिएको छ, जसले १० देखि १५ डिग्रीसम्म तापक्रम घटाउन सक्ने दाबी गरिएको छ । गर्मीमा बाइक ड्राइभ गर्दा वा अन्य कुनै काम गर्दा सो एसी हेलमेटले टाउकोलाई चिसो राख्न मदत गर्ने दाबी गरिएको छ ।

कम्पनीले सो हेलमेटमा सानो फ्यान र कुलिङ सिस्टम जडान गरेको छ । हेलमेटमा रहेको ब्याट्रीले फ्यानलाई शक्ति दिन्छ । केही मोडेलमा चिसो हावाको लागि जेल प्याक वा इभेपोरेटिभ कुलिङ सिस्टम पनि प्रयोग गरिएको हुन्छ ।

एसी हेल्मेट चार्ज गर्न पनि आवश्यक छ । भारत वा अन्य देशमा उपलब्ध हेलमेटका केही मोडेलमा सौर्य प्यानल जडान गरिएको हुन्छ । हेलमेटमा रहेको एयर भेन्टले चिसो हावा भित्र ल्याउँछ र तातो हावा बाहिर निकाल्छ ।