नयाँ स्विफ्टको भारतमा बुकिङ खुला, के छ नयाँ विशेषता ?

मारुती सुजुकीले आफ्नो लोकप्रिय ह्याचब्याक स्विफ्टको नयाँ जेनरेसनको बुकिङ लिन थालेको छ । कम्पनीले यसको नयाँ जेनेरेशन कार जापान र युरोपका देशमा यसअघि नै लन्च गरिसकेको थियो । यो नयाँ कारलाई ११ हजार भारु भुक्तानी गरेर वुकिङ गर्न सकिने जनाइएको छ ।

२०२४ स्विफ्टको डिजाइनमा पुरानो स्विफ्टको तुलनामा धेरै परिवर्तन गरिएको छ । पुरानो स्विफ्टको तुलनामा नयाँ स्विफ्टको बम्पर, फ्रन्ट ग्रिल, बोनट र हेडलाइटमा परिवर्तन गरिएको हो । कारमा ६ वटा एयरब्याग, ३६० डिग्री क्यामेरा, भ्यान्टीलेटेड सिट, प्रिमियम अपहोलस्टीक, ९ इन्चको इन्फोटेन्टमेन्ट सिस्टम, वायरलेस कनेक्टीभीटी र एडास लगायत फिचर थपिएको छ । साथै यसअघिको सिंगल टोन कलर इन्टेरिलाई डुअल टोन दिइएको छ ।

पुरानो स्विफ्टको तुलनामा नयाँ स्विफ्टको डाइमेन्सनमा पनि फरक छ । पुरानो स्विफ्टको तुलनामा नयाँ स्विफ्ट १५ एमएम लामो र ३० एमएम अग्लो पनि हुनेछ । भारत र नेपालमा नयाँ स्विफ्ट लन्च गर्नुअघि कम्पनीले आफ्नो नयाँ पुस्ता धेरै देशमा लन्च गरिसकेको छ ।

कम्पनीले नयाँ जेनेरेशन स्वीफ्टमा १.२ लिटर जेड सिरिज इन्जिन दिएको छ । उक्त इन्जिनले पहिलोको भन्दा ३ किलोमिटर प्रतिलिटर माइलेज दिने कम्पनीको दावी छ । उक्त इन्जिनले अधिकतम ८३ पीएस पावर र १०८ एनएम टर्क प्रदान गर्छ ।