सेरेस र हुवावेद्वारा स्थापित ‘एइटो’ बन्याे चीनको टप ‘न्यु फोर्स’ कम्पनी, ८२४% बढी बिक्री

टेक जायन्ट हुवावे र चीनको प्रसिद्ध इलेक्ट्रिक कार निर्माता कम्पनी सेरेसको हार्मोनी इन्टेलिजेन्ट मोबिलिटी एलायन्समा रहेको चाइनिज ईभी ब्रान्ड एइटो (AITO) ले सन् २०२४ को पहिलो तीन महिनामा उल्लेखनिय उपलब्धि हासिल गरेको छ ।

मार्च महिनामा एइटोका ३१ हजार ७२७ युनिट गाडी बिक्री भए । यो भन्दा पहिले जनवरीमा ३२ हजार ९७३ र फेब्रुअरीमा २१ हजार १४२ युनिट बिक्री भएका थिए । यस अनुसार तीन महिनामा समग्रमा ८५ हजार ८४२ युनिट गाडी बिक्री भएका छन् ।

मार्च महिनामा अघिल्लो महिनाको तुलनामा बढी सवारी साधन डेलिभरी भएका छन् । ती मध्ये एइटोको एम७ मोडल सबैभन्दा बढी अर्थात २४ हजार ५९८ युनिट बिक्री भएका छन् । त्यसैगरी गत वर्षको पहिलो तीन महिनाको तुलनामा यो वर्षको तीन महिनामा एकैपटक ८२४ प्रतिशत बढी यो ब्रान्डका सवारी साधन बिक्री भएका छन् । यो समग्र अटोमोटिभ ब्रान्डमै एक रेकर्ड हो ।

यस अनुसार चीनका ‘न्यु फोर्स’ अटोमोटिभ निर्माता कम्पनीहरुमा सबैभन्दा टपमा एइटो ब्रान्ड पर्न सफल भएको छ ।

हुवावे र सेरेस ब्रान्डले संयुक्त रुपमा एइटो ब्रान्ड सन् २०२१ डिसेम्बरमा स्थापना गरेका थिए । हाल एइटोले एम५, एम७ र एम९ मोडल उत्पादन गर्दै आएको छ । यस अन्तर्गत रेन्ज एक्सटेन्डर हाइब्रिड र प्योर इलेक्ट्रिक भर्सनमा सवारी साधन उपलब्ध छन् ।

अटोमोटिभ इन्डष्ट्रीमा न्यु फोर्स भन्नाले परम्परागत कार निर्माता कम्पनी वाहेक नयाँ स्थापित कार निर्माता कम्पनी मानिन्छ । यद्यपि धेरै कार बिक्री गर्ने भएर पनि बीवाईडीलाई भने यो समूहमा राखिएको छैन ।

यस अनुसार चीनको न्यु फोर्स अटोमोटिभ ब्रान्डमा एइटोका साथै नियो, एक्सपेङ, लि अटो र लिप मोटर समेत पर्छन् । यी कम्पनीहरुले प्रत्येक महिनाको पहिलो दिन अघिल्लो महिनाको बिक्री तथ्यांक समेत सार्वजनिक गर्छन् ।