भारतमा नयाँ स्विफ्टको बुकिङ खुला, कहिले आउँला नेपाल ?

मारुती सुजुकीको सर्बाधिक सफल ह्याचब्याक कार स्विफ्ट नयाँ अबतारमा आउँदै छ । भारतीय बजारमा अर्को महिना लन्च हुने अपेक्षा गरिएको सो कारको बुकिङ खुला गरिएको हो । नेपाली बजारमा समेत लोकप्रिय बनेको सो कारको नयाँ अबतार भारतमा लन्च भए लगत्तै आउने अनुमान गर्न सकिन्छ ।

चौथो पुस्ताको स्विफ्टलाई सुजुकीले २०२३ को जापान मोबिलिटी शोमा विश्वव्यापी रूपमा डेब्यू गरेको थियो । रिपोर्टका अनुसार भारत–विशेष कार अलि फरक हुनेछ । यसमा अगाडि र पछाडि फरक फरक बम्पर, ब्ल्याक आउट सी–पिलर, एलईडी हेडलाइट, एलईडी फग ल्याम्प र बुट लिडमा माउन्ट गरिएको रिभर्स क्यामेरा पाउने अपेक्षा गरिएको छ ।

२०२४ मारुती सुजुकी स्विफ्टमा नयाँ जेड सिरिज १.२–लिटर ३–सिलिन्डर माइल्ड–हाइब्रिड पेट्रोल इन्जिन हुनेछ । यसको आउटपुट के१२ इन्जिनको जस्तै हुने अपेक्षा गरिएको छ र छ–स्पीड म्यानुअल अर्थात एएमटी गियरबक्ससँग जोडिनेछ ।

स्विफ्टमा ६ वटा एयरब्याग, एबीएस सहित ईबीडी र ईएसपी हुने अपेक्षा गरिएको छ । ३६० डिग्री क्यामेरा र एडिएएस जस्ता सुविधाहरू भारतीय बजारमा उपलब्ध नहुन सक्छ ।