सुजुकीको नयाँ स्विफ्टमा ६ एयर ब्याग र एडीएएस फिचर हुने

मारुती सुजुकीले आफ्नो सबैभन्दा लोकप्रिय कार स्विफ्टको फेसलिफ्ट संस्करण ९ मेमा भारतीय बजारमा लन्च गर्ने भएको छ । कम्पनीले यसको कोडनेम वाईईडी राखेको छ । साथै कम्पनीले यो वर्षको अन्त्यमा नयाँ डिजायर कम्प्याक्ट सेडान बजारमा ल्याउने तयारी गर्दैछ । नेक्स्ट जेनेरेसन स्विफ्टमा ६ एयर ब्यागसहित एडीएएस जस्ता एड्भान्स फिचर पनि समावेश गरेको छ ।

नेक्स्ट जेनेरेसन स्विफ्टको पावरट्रेनमा ठुलो परिवर्तन हुनेछ । यसमा के१२ पेट्रोल इन्जिनको सट्टा जेड सिरिजको नयाँ १.२ लिटर ३ सिलिन्डर पेट्रोल इन्जिन दिइनेछ । सो इन्जिनले ९० एचपी पावर र ११३ एनएमको टर्क जेनेरेट गर्छ ।

कम्पनीले नयाँ स्विफ्टको ट्रान्समिसनको विवरण भने खुलाएको छैन, तर यसमा ५ स्पिड म्यानुअल र एएमटी गियरबक्सको विकल्प हुने अपेक्षा गरिएको छ । साथै यसमा सीएनजी र हाइब्रिड इन्जिन विकल्पमा पनि पेश गर्न सक्ने सम्भावना छ । कम्पनीले यसमा पुरानो लुक कायम राखेको छ । यसको अगाडि प्रोजेक्टर सेटअप सहित शार्प लुक हेडल्याम्प प्रदान गरिएको छ । यसमा इनबिल्ट एलईडी डेटाइम रनिङ ल्याम्प पनि छ ।

कम्पनीको लोगो अब ग्रिलको माथि र बोनटको ठीक तल राखिएको छ । फ्रन्टको बम्परमा पनि केही परिवर्तन गरिएको छ । साइड प्रोफाइलमा १६ इन्चको अलोय ह्विल बाहेक अरु कुनै परिवर्तन गरेको छैन । पछाडिको टेललाइट पनि परिवर्तन गरिएको छ । टेलगेटमा हाइब्रिड ब्याजिङ दिइएको छ ।

नयाँ स्विफ्ट हालको मोडलको तुलनामा १५ एमएम लामो, ४० एमएम फराकिलो, ३० एमएम अग्लो छ र ह्विलबेस २४५० एमएमको छ । कम्पनीले यसलाई फोर्थ जेनेरेसन मोडल भनेता पनि नयाँ जेनरेशन स्विफ्ट सोही हार्टेक्ट प्लेटफर्ममा आधारित छ ।

कारको इन्टेरियरमा ब्ल्याक एण्ड ह्वाइट ड्युअल टोन थिमसहितको सबै नयाँ ड्यासबोर्ड समावेश गरिएको छ । यसमा ९.० इन्चको फ्लोटिङ इन्फोटेनमेन्ट सिस्टमसहितको नयाँ ड्यासबोर्ड, स्लिक एसी भेन्ट्स र तल एचभीएसी कन्ट्रोल उपलब्ध छ । यसमा वायरलेस एप्पल कारप्ले÷एन्ड्रोइड अटो, कनेक्टेड कार टेक्नोलोजी, स्टेयरिङ माउन्टेड कन्ट्रोल र अटोमेटिक क्लाइमेट कन्ट्रोल जस्ता फिचर समावेश छ ।

नयाँ स्विफ्टमा ३६० डिग्री क्यामेरा र ड्ष्ुअल सेन्सर ब्रेक सपोर्ट, एडाप्टिभ हाई बीम असिस्ट, ड्राइभर मोनिटरिङ सिस्टम र कोलिजन मिटिगेसन ब्रेकिङ सिस्टम जस्ता एडीएएस, भेन्टिलेटेड सिट, अटो होल्डसहितको इलेक्ट्रोनिक पार्किङ ब्रेक र ६ वटा एयरब्याग जस्ता फिचर समावेश छ ।

नयाँ स्विफ्टको मूल्य ६ लाख भारुबाट सुरु हुने अपेक्षा गरिएको छ । भारतमा यसको प्रतिस्पर्धा हुन्डाई ग्राण्ड आई १० निओस र टाटा टियागोसँग हुनेछ ।