एनआईयूका विद्युतीय स्कुटर खरिद गर्न राइडरलाई टुटलले ५० हजार सहयोग गर्ने

काठमाडौं – राइड सेयरिङ प्लेटफर्म टुटलले राइडरहरुलाई एनआईयू ब्रान्डका विद्युतीय स्कुटर खरिद गर्नका लागि ५० हजार रुपैयाँ सहयोग गर्ने भएको छ ।

यसका लागि टुटल र एनआईयूको नेपालका लागि आधिकारिक वितरक इको इन्फिनिटी बिच एक साझेदारीको घोषणा भएको छ ।

यसले प्रयोगकर्तालाई दैनिक यात्राका क्रममा पर्यावरण- अनुकूल विकल्प छनौट गर्न र आफ्ना कारण हुने कार्बन उत्सर्जन घटाउन सहयोग पुर्‍याउनेछ । टुटलले आफ्ना राइडरहरूका लागि "हन्ट" (Hunt) नामक नयाँ लक्ष समेत घोषणा गरेको छ ।

जसले सबैभन्दा धेरै राइड पूरा गर्न र कमाई बढाउन सहयोग पुर्‍याउनेछ । दैनिक, साप्ताहिक वा मासिक रूपमा त्यस्ता लक्ष रहने बताइएको छ । "प्रत्येक हन्ट समापनमा राइडरलाई उनीहरूले पूरा गरेका लक्षको आधारमा नगद पुरस्कार प्रदान गरिनेछ । यसबाट राइडरहरूको आयमा ‌बृद्धि हुनेछ," कम्पनीले अगाडि भनेको छ ।

५० प्रतिशत राइडरहरू विद्युतीय सवारीमा परिवर्तन होऊन् भन्ने आफ्नो चाहना भएको टुटलका प्रबन्ध निर्देशक रुबिक जोशीले बताए । "जसले भविष्यमा देशको वातावरणलाई सुधार्न मद्दत गर्नेछ," उनले भने । "भावी पुस्ताका लागि हरित र स्वच्छ वातावरण बनाउने यो हाम्रो सानो पहल हो ।"

यात्रुहरूलाई विद्युतीय सवारी प्रयोग गर्न प्रोत्साहित गर्ने उद्देश्यका साथ टुटलले तीन महिने अभियान समेत सुरु गरेको छ । जसमा राइडरहरूले न्यु स्कुटर जित्नका लागि अभियान अवधिभर ३०० राइड पूरा गर्नु पर्नेछ ।

वातावरणमैत्री यातायातको प्रवर्द्धन गरी स्वच्छ वातावरणलाई बढावा दिने र नेपालको यातायात परिदृश्यमा क्रान्ति ल्याउने उद्देश्यका साथ यस किसिमको सहकार्य थालिएको टुटलले जनाएको छ ।