सीट्रोन ईसी–३ मा थपियो नयाँ भेरिएन्ट, यस्तो छ मूल्य र फिचर

फ्रेन्च अटो निर्माता सिट्रोनले ईसी–३ को नयाँ भेरिएन्टलाई भारतमा लन्च गरेको छ । यसअघि फील र लाईभ भेरिएन्टमा मात्र उपलब्ध ईसी–३ को टप स्पेक भेरिएन्ट साइन थप भएको हो ।

सो नयाँ भेरिएन्ट तीनवटा ट्रिममा उपलब्ध हुने र मूल्य १३ लाख १९ हजार ८०० देखी १३ लाख ४९ हजार ८०० भारुसम्म पर्ने जनाइएको छ । ईसी–३ लाई कम्पनीले गत वर्षको फेब्रुअरी महिनामा लन्च गरेको थियो ।

सो नयाँ भेरिएन्टमा इलेक्ट्रोनिकल्लि एड्जस्टेवल ओआरभीएमएस, रियर पार्किङ क्यामेरा, १५ इन्चको डायमन्ड कट अलोई ह्विल, फ्रन्ट र रियरमा स्किड प्लेट, रियर वाइपर एबं वासर, रियर डिफगर र लेदरले वेरिएको स्टेरिङ ह्विल थप गरिएका छन् । बाँकी फिचर र मेकानिकल पक्षमा भने कुनै परिवर्तन गरिएको छैन ।

नेपाली बजारमा समेत उपलब्ध ईसी–३ मा २९.२ किलोवाट आवरको ब्याट्री र ४२ किलोवाटको इलेक्ट्रिक मोटर जडान गरिएको छ । ३.३ किलोवाट अनबोर्ड एसी चार्जर दिइएको यो ईभीलाई एकपटक फुल चार्ज गरेपछि ३२० किलोमिटरसम्म यात्रा गर्न सकिने एआरएआईले दावी गरेको छ ।

साथै यसको पावर ५६ बीएचपी र टर्क १४३ एनएम रहेको छ । १०७ किलोमिटर टप स्पिड भएको यसलाई डिसी फास्ट चार्जरको साहयतामा ५७ मिनेटभित्रै १० देखी ८० प्रतिशतसम्म चार्ज गर्न सकिन्छ ।

सांग्रिला मोटर्सले बिक्री गर्दै आएको यो ईलेक्ट्रिक कारको मूल्य नेपाली बजारमा ३२ लाख ९९ हजार र ३४ लाख ९९ हजार निर्धारण गरिएको छ । कम्पनीले यसको टप स्पेक भेरिएन्टलाई पनि छिट्टै ल्याएर बिक्री गर्ने अनुमान गर्न सकिन्छ ।