फोर्डलाई पछि पार्दै बीवाईडी बन्यो विश्वमा चौथो धेरै बिक्री हुने कार ब्रान्ड

चिनियाँ अटो निर्माता बीवाईडी विश्वमा चौथो धेरै बिक्री हुने कार ब्रान्ड बनेको छ । ट्रेन्ड फोर्सले अगष्ट महिनामा सार्वजनिक गरेको बिक्री तथ्यांकको आधारमा यसले अमेरिकन ब्रान्ड फोर्डलाई पछि पार्दै चौथो स्थानमा उक्लिएको हो । सूचीको पहिलो स्थानमा टोयोटा, दोस्रोमा फक्सवागन, तेस्रोमा होन्डा र पाँचौ स्थानमा हुन्डाई र छैठौमा फोर्ड रहेका छन् ।

गत महिना विश्वका ३७ ठूला अटो बजारमा बिक्री भएको कुल ५५ लाख ५० हजार कारमा बीवाइडीको हिस्सा ४.८ प्रतिशत रहेको छ । यसैगरी पहिलो स्थानमा रहेको टोयोटाले ९.८, दोस्रो स्थानको फक्सवागनले ६.५ र तेस्रो स्थानको होन्डाले ४.९ प्रतिशत हिस्सा ओगटेका छन् । पाँचौ स्थानमा रहन सफल हुन्डाईको हिस्सा ४.३ प्रतिशत र फोर्डको ४.२ प्रतिशत छ ।

चिनियाँ बजारमा कारको मागमा कमि आएपनि अन्तराष्ट्रिय बजारमा इलेक्ट्रिक कारको माग उच्च रहेका कारण बीवाइडीले जुलाई महिनाको तुलनामा ५ प्रतिशतले बिक्रीमा सुधार गरेको थियो । उता फोर्डको ठूलो बजार अमेरिकामा भने बिक्री निरन्तर ओरालो लागेका कारण उसको बिक्री अघिल्लो महिनाको तुलनमा ६.७ प्रतिशतले घटेको थियो ।

सो महिना चीनमा कुल १९ लाख २० हजार कार बिक्री भएकोमा बीवाइडी एक्लैले २ लाख ३० हजार युनिट बिक्री गर्दै ११.९८ प्रतिशत हिस्सा सहित पहिलो स्थान लिएको छ । यसैगरी फक्सवागनको १०.१८, टोयोटाको ८.१० प्रतिशत, होन्डाको ५.३२ र चांगनको हिस्सा ४.२८ प्रतिशत छ ।