फोटोन टीएम–१ को मूल्य २९ लाख ९९ हजार, यस्ता छन् विशेषता

काठमाडौं– फोटोन गाडीको नेपालका लागि आधिकारिक बिक्रेता एमएडब्लू वृद्धि कमर्सियल भेहिकलले इलेक्ट्रिक ट्रक टीएम–१ को सुरुवाती मूल्य २९ लाख ९९ हजार रुपैयाँ तोकेको छ । यो मूल्य सीमित अवधिका लागि लागू हुने कम्पनीले जनाएको छ ।

हालै सम्पन्न नाडा अटो शो २०२३ मा यो इभी ट्रक औपचारिक रुपमा सार्वजनिक गरिएको थियो । उक्त अटो शोमा टीएम–१ को उल्लेखीय बुकिङ भएको कम्पनीको दाबी छ । यो ट्रकमा ३८.६४ किलोवाट आवरको ब्याट्री प्याक जडान गरिएको छ । सीएटिएलले उत्पादन गरेको उक्त ब्याट्री प्याकले एक पटकको फुल चार्जमा २८० किलोमिटर रेन्ज प्रदान गर्ने कम्पनीले जनाएको छ ।

सीसीएस–२ चार्जिङ पोर्ट रहेको यो गाडीलाई फास्ट चार्जरबाट फुल चार्ज गर्न एक घण्टाको समय लाग्छ । एसी चार्जरबाट ६ घण्टामा फुल चार्ज हुन्छ । १६० एमएमको ग्राउन्ड क्लियरेन्स भएको यसको टप स्पिड ९० किलोमिटर प्रतिघण्टा रहेको छ ।

यसमा भएको मोटरको पिक पावर ६० किलोवाट छ भने यसको टर्क २२० एनएम रहेको जनाइएको छ । उक्त गाडीको पेलोड क्षमता १४०० किलोे छ ।