नेपाली बजारमा थपियो उत्कृष्ट रेन्जको अर्को इलेक्ट्रिक भ्यान

काठमाडौं नेपाली बजारमा विभिन्न ब्रान्डका इलेक्ट्रिक भ्यान अर्थात माइक्रोबस लोकप्रिय भइरहेको समयमा अर्को ब्रान्ड एसआरएमका इलेक्ट्रिक भ्यान समेत भित्रिएका छन् । नेपालका लागि आधिकारिक वितरकको रुपमा पूजा कन्स्ट्रक्सनले सो भ्यान भित्र्याएको हो ।

एसआरएमको एक्स३०एल मोडलको सो भ्यानले सिंगल चार्जमा ३०० किलोमिटरको रेन्ज दिने कम्पनीको भनाइ छ । यसमा भएको सीएटीएलको लिथियम आइरन फस्फेट ब्याट्रीलाई फास्ट चार्जरको सहयोगले ४५ मिनेटमै फुल चार्ज गर्न सकिने छ । सामान्य अवस्थामा भने फुल चार्ज गर्न करिव १२ घण्टा जति लाग्ने छ ।

५ वर्ष वा २ लाख किलोमिटर गुड्दा सम्म ब्याट्रीमा वारेन्टी उपलब्ध हुने कम्पनीको भनाइ छ ।

४४ लाख ५० हजार रुपैयाँ मूल्य तोकिएको सो इलेक्ट्रिक भ्यानमा एबीएस, चाइल्ड सेफ्टी लक, पावर विन्डो, पार्किङ सेन्सरसहितको रिभर्स क्यामेरा, किलेस इन्ट्रीलगायत विशेषताहरू छन्। त्यस्तै यो विद्युतीय भ्यानको ग्राउन्ड क्लियरेन्स १८० एमएम रहेको छ।

हाल विशेष गरी काठमाडौंबाट पूर्व क्षेत्रतिरका रुटहरुमा यस्ता माइक्रो भ्यान लोकप्रिय बनिरहेका छन् ।