नेपाल भित्रिए इटालियन ब्रान्ड इनर्जिकाका प्रिमियम इलेक्ट्रिक मोटरसाइकल

काठमाडौं – नेपाली बजारमा इटालियन ब्रान्ड इनर्जिकाका इलेक्ट्रिक मोटरसाइकल भित्रिएका छन् । नेपालका लागि आधिकारिक वितरकको रुपमा इन्ड्युरो मोटर्सले इनर्जिका इलेक्ट्रिक मोटरसाइकल बिक्रीका लागि उपलब्ध गराउने भएको हो ।

चार मोडलका इलेक्ट्रिक मोटरसाइकल उपलब्ध छन् । नक्सालस्थित सोरुममा यी इलेक्ट्रिक मोटरसाइकल अवलोकन गर्न सकिन्छ ।

डुकाटी, बेनेली जस्ता प्रिमियम ब्रान्डको कारोबार गरिरहेको समूहले नै इनर्जिकाका इलेक्ट्रिक मोटरसाइकल नेपाल भित्र्याएको हो । यही समूहले नै नेपाली बजारमा इभोक ब्रान्ड समेत भित्र्याएको समाचार केही दिन पहिले सार्वजनिक भएको थियो ।

इनर्जिकाका चार मोडल नेपाली बजारमा उपलब्ध हुने छन् । इनर्जिका इगो, इगो प्लस आरएस, ईएसएसई ९ र इभा रिबेल गरी चार मोडल छन् ।

यी मध्ये इनर्जिका इगो, इगो प्लस आरएस र इभा रिबेल सबैमा ११० किलोवाट पावर छ भने ईएसएसई ९ मा ८० किलोवाट पावर छ । यी मोटरसाइकलको मूल्य भने अहिले सार्वजनिक गरिएको छैन । यसको मूल्य केही दिनमै सार्वजनिक गरिने कम्पनीको भनाइ छ । यी मोटरसाइकलले सिंगल चार्जमा ४२० किलोमिटर सम्मको रेन्ज दिने कम्पनीको भनाइ छ ।

इनर्जिकाले गत वर्ष अन्तर्राष्ट्रिय बजारमा सिंगल चार्जमा ४२० किलोमिटर चल्ने र ४० मिनेटमै ८० प्रतिशत चार्ज हुने एड्भेन्चर मोटरसाइकल ‘एक्सपेरिया’ समेत सार्वजनिक गरेको थियो । आगामी दिनमा यो बाइक समेत नेपाली बजारमा उपलब्ध हुने अनुमान गर्न सकिन्छ ।