विश्वका टप १० फ्युचर रेडी कारको सूची सार्वजनिक : ३ चाइनिज ब्रान्ड, बीवाईडी दोस्रो नम्बरमा

विश्वका टप १० सबैभन्दा बढी ‘फ्युचर रेडी’ अर्थात भविष्यका लागि तयार कारहरुको सूचीमा ३ चिनियाँ अटो ब्रान्ड परेको छन् । अटो.इन्डष्ट्रिका लागि तयार गरिएको २०२३ फ्युृचर रेडिनेस इन्डिकेटर अनुसार सो तथ्य सार्वजनिक भएको हो ।

यी मध्ये चाइनिज कार निर्माता कम्पनी बीवाईडी गत वर्ष भन्दा ३ स्थान माथि उक्लेर दोस्रो स्थानमा पुगेको छ । पहिलो स्थानमा टेस्ला रहेको छ । त्यसैगरी एक्सपेङ छैटौं र लि अटो सातौ स्थानमा रहेका छन् ।

सूची अनुसार तेस्रो नम्बरमा फक्सवागन, चौथो नम्बरमा हुन्डाई र पाँचौ नम्बरमा फोर्ड रहेका छन् ।

त्यसैगरी आठौ नम्बरमा मर्सिडिज, नवौं नम्बरमा जनरल मोटर्स र दशौं नम्बरमा टोयोटा रहेका छन् ।

इन्टरनेसनल इन्स्टिच्युट फर म्यानेजमेन्ट डेभलपमेन्ट (आईएमडी) ले प्रकाशित गरेको रिपोर्ट अनुसार भविष्यको चुनौतीलाई समेत सामना गर्न सक्ने विश्वका प्रमुख कार निर्माता कम्पनीहरुलाई सो सूचीमा समावेश गरिन्छ ।

सन् २०१० देखि प्रकाशित हुँदै आएको सो सूची कम्पनीको फाइनान्सियल फन्डामेन्टल, इन्भेस्टर एक्सपेक्टेसन, बिजनेस डाइभर्सिटी, रिसर्च एन्ड डेभलपमेन्ट, इनोभेसन तथा नगद मौज्दात एवं ऋण समेतको आधारमा कम्पनीको पर्फमेन्स अनुसार सार्वजनिक हुन्छ ।