चखन्डोल सामुदायिक वनमा बीवाईडीले रोप्यो १५ सय विरुवा, वनको गौरवलाई पुनर्जीवन दिने अपेक्षा

काठमाडौं – बीवाईडी इलेक्ट्रिक गाडीको नेपालका लागि आधिकारिक वितरक साइमेक्स इंकले काठमाडौंको चखन्डोल सामुदायिक वनमा वृक्षारोपण कार्य सम्पन्न गरेको छ । विश्व वातावरण दिवसको अवसरमा सो कार्यको शुभारम्भ गरिएको हो ।

वन तथा वातावरण मन्त्री वीरेन्द्र प्रसाद महतो र बीवाईडी गाडीको ब्रान्ड एम्बेसडर कलाकार हरिबंश आचार्य, साइमेक्स इंककी प्रबन्ध निर्देशक यमुना श्रेष्ठ र सीईओ साहिल श्रेष्ठ लगायतले सो कार्यको शुभारम्भ गरे ।

साइमेक्स इंकले संस्थागत सामाजिक उत्तरदायित्व पहल अन्तर्गत Building Dreams & Forest अभियान अन्तर्गत सो कार्य गरेको जनाएको छ । सो रणनीतिक अभियानले २०६२ सालमा अवैध बालुवा उत्खनन र वन फँडानीको सिकार भएको चखन्डोल सामुदायिक वनलाई पुनर्स्थापना र पुनर्जीवित गर्ने लक्ष्य राखिएको छ।

रिभोलुसन प्रोजेक्टसँगको सहकार्यमा साइमेक्सले नवीन मियावाकी प्रविधि प्रयोग गरी १५०० रूख रोप्ने कार्यको नेतृत्व गर्नेछ। यो पहल बीवाईडीको भिजन ‘कुल द अर्थ बाई वान डिग्री’ दृष्टिकोणसँग मिल्ने र वातावरणीय दिगोपन र जैविक विविधता संरक्षणमा कम्पनीको अटल प्रतिबद्धता प्रदर्शन गर्ने बताइएको छ ।

विगतमा धेरै क्षति व्यहोरेको चखन्डोल सामुदायिक वन यसबाट पुनर्जीवित हुने र स्वदेशी रुखका प्रजातिमार्फत वनको गौरवलाई कायम राख्ने बताइएको छ । यसबाट पारिस्थितिक सन्तुलन कायम गर्नेछ ।

वृक्षारोपणको पहिलो वर्षमा आयोजनाले ८२७ टन अक्सिजन उत्पादन गर्ने र ३१० टन कार्बन भण्डारण गर्ने प्रक्षेपण गरिएको छ । पाँच वर्षको अवधिमा बीवाईडी वनले १५५० टन कार्बन पृथक गर्दै एक प्रभावशाली ४१३३ टन अक्सिजन उत्पादन गर्ने लक्ष्य राखेको छ।