सन् २०२२ मा बिक्री भएका टप १० इलेक्ट्रिक कार : टेस्लाका दुई र बीवाईडीका चार मोडल सूचीमा

सवारी साधन सम्बन्धी लोकप्रिय वेबसाइट मोटर १ ले सार्वजनिक गरेको तथ्यांक अनुसार सन् २०२२ मा सबैभन्दा धेरै बिक्री हुने इलेक्ट्रिक कार टेस्ला मोडल वाई बनेको छ ।

टेस्ला मोडल वाई यो वर्ष ७ लाख ४७ हजार ५ सय युनिट बिक्री भएको छ । अघिल्लो वर्ष भन्दा यो वर्ष टेस्ला मोडल वाई २३ प्रतिशत बढी बिक्री भएको हो ।

दोस्रो नम्बरमा पनि टेस्लाकै मोडल ३ रहेको छ । ४ लाख ८२ हजार २ सय युनिट बिक्री भए पनि यसको बिक्री भने यो वर्ष ३ प्रतिशतले घटेको छ ।

तेस्रो नम्बरमा वुलिङ होङगुवाङ मिनी ईभी रहेको छ । सो मिनी ईभी १४ प्रतिशत बढी अर्थात ४ लाख ४३ हजार ४ सय युनिट बिक्री भएको छ ।

चौथो र पाँचौ नम्बरमा बीवाईडी डल्फिन र एट्टो ३ रहेका छन् । बीवाईडी डल्फिन ९१६ प्रतिशत बढी बिक्री भएका छन् । यस अनुसार सो कार २ लाख ५ हजार २ सय युनिट बिक्री भएका छन् ।

बीवाईडी एट्टो ३ चीनमा युआन प्लस ब्रान्ड नेममा बिक्री हुन्छ । यो नयाँ इलेक्ट्रिक कार हो । यो वर्ष सो कार १ लाख ८० हजार ६ सय युनिट बिक्री भएको छ ।

छैटौं नम्बरमा फक्सवागन आईडी ४, सातौ नम्बरमा बीवाईडी किन र आठौ तथा नवौ नम्बरमा एइओन वाई र एईओन एस रहेका छन् ।

दशौं नम्बरमा फेरि बीवाईडी नै रहेको छ । बीवाईडी हान ईभी दशौ नम्बरमा रहेको छ ।