नेपाल अटो जिमखाना च्याम्पियनसिपमा प्रथम बने आशिष

नेपाल अटोमोबाइल्स एसोसिएसन (नासा नेपाल) बागमती प्रदेश संघद्वारा आयोजित नेपाल अटो जिमखाना च्याम्पियनसिपमा आशिष भारती प्रथम भएका छन् ।

शनिबार चितवनको भरतपुरमा सम्पन्न सो इभेन्टमा फिलिक्स भानले द्वितीय तथा दिग्विजय सिंह अधिकारीले तृतीय स्थान हासिल गरे । प्रथम, दोश्रो र तेश्रो हुनेले क्रमशः २७ हजार, ९ हजार तथा ३ हजार नगद, शिल्ड तथा प्रमाणपत्र प्राप्त गरे ।
त्यसैगरी महिलातर्फ बेष्ट टाइमरमा दुर्गा लक्ष्मी रञ्जितकार तथा चितवन तर्फको वेष्ट पर्फमेन्स अवार्ड विमल पौडेलले प्राप्त गरे ।

भरतपुर महानगरपालिकाका प्रमुख रेणु दाहाल, एफआईए वर्ल्ड काउन्सिल मेम्बर गोविन्द भट्टराई तथा नासा नेपाल बागमतीका अध्यक्ष राजन पियाले विजयीहरुलाई नगद, शिल्ड र प्रमाणपत्र प्रदान गरे ।

पुरुषबाट प्रथम आशिष र महिला तर्फको बेष्ट परफर्मर दुर्गा लक्ष्मीलाई आगामी नोभेम्बरमा हुने एसिया प्यासिफिक अटो जिमखाना च्याम्पियनसिपमा नेपालबाट छनौट गरियो, जुन चाइनिज ताइपेइमा हुनेछ ।

राष्ट्रिय खेलकुद परिषदको आर्थिक सहयोग, भरतपुर महानगरपालिका र उवासंघ चितवनको लजिष्टिक र पुरस्कार सहयोग तथा महालक्ष्मी ड्राइभिङ्ग सेन्टरको प्राविधिक सहयोगमा सम्पन्न सो कार्यक्रम नासा नेपालको राष्ट्रिय कार्यक्रम भएको नासा नेपालले जनाएको छ ।