९ महिनामा २,४५१ युनिट विद्युतीय गाडी आयात, यस्तो छ अवस्था

काठमाडौं – चालु आर्थिक वर्षको ९ महिनामा नेपालमा २ हजार ४५१ युनिट विद्युतीय कार, जिप र भ्यान आयात भएका छन् । भन्सार विभागको तथ्यांक अनुसार यसबाट ६ अर्ब ८४ करोड रुपैयाँ बाहिरिएको छ भने सरकारले १ अर्ब ९३ करोड राजश्व उठाएको छ।

चैत महिनामा २५३ युनिट विद्युतीय कार, जिप र भ्यान आयत भएका छन्।

यो अवधिमा सबैभन्दा धेरै भारतबाट ४ अर्ब ७१ करोड ९८ लाख रुपैयाँको १७५५ युनिट विद्युतीय कार, जिप र भ्यान आयात भएको छ।

यसैगरी, चीनबाट १ अर्ब ८ करोड ५१ लाख बराबरको ४२९ युनिट, कोरियाबाट यो अवधिमा १ अर्ब ६ करोड ६७ लाख रुपैयाँको २६० युनिट र इन्डोनेसियाबाट ६४ लाख रुपैयाको ३ युनिट तथा अमेरिकाबाट २ करोड २७ लाख बराबरको ४ वटा विद्युतीय गाडी आयात भएका छन्।

सो अवधिमा सबैभन्दा बढी १०० किलोवाटभन्दा कम रेन्जका विद्युतीय कार, जिप र भ्यान आयात भएका छन्। विभागका अनुसार यो अवधिमा नेपालमा ६ अर्ब ५२ करोड बराबरको २३ सय ७९ युनिट १०० किलोवाटभन्दा कम रेन्जको विद्युतीय सवारी साधन आयात भएका छन् ।

त्यसैगरी, १०० किलोवाटदेखि २०० किलोवाटसम्मको २७ करोड १२ लाख बराबरको ६५ युनिट र २०० किलोवाटदेखि ३०० किलोवाटसम्मको ४ करोड ६५ लाख बराबरको ७ युनिट विद्युतीय कार, जिप र भ्यान आयात भएका छन् ।

यो अवधिमा कम्बसन इन्जिनबाट चल्ने सवारी साधन भने २ हजार ८ युनिट मात्र आयात भएका छन् । सरकारले चालु आर्थिक वर्षको सुरुदेखि नै निरन्तर प्रतिबन्ध कायम राखेको पेट्रोलियम पदार्थबाट चल्ने कारको आयात पुस १ गतेबाट खुल्ला गरेको थियो । यद्यपि अहिले पनि यी कारको आयात कमै मात्र भएको छ ।