महिन्द्रा एक्सयूभी ४०० को डेलिभरी शुरु, कहिले आउला नेपाल

भारतमा महिन्द्राको पहिलो स्पोर्ट्स युटिलिटी भेइकल ‘एक्सयूभी ४००’ को डेलिभरी प्रारम्भ भएको छ । पहिलो चरणमा ४ सय युनिट एक्सयूभी ४०० डेलिभरी भएको हो ।

यद्यपि महिन्द्रा एक्सयूभीको टप स्पेक ईएल भेरिएन्ट मात्र हाल डेलिभरी भएको छ । यसको बेस स्पेक ईसी भेरिएन्टको डेलिभरी भने यस वर्षको अन्त्यसम्ममा सुरू हुने कम्पनीले बताएको छ ।

नेपालमा समेत महिन्द्रा एक्सयूभी ४०० को प्रतीक्षा भइरहेको छ । हाल महिन्द्राको नेपालका लागि आधिकारिक वितरक अग्नि इनर्जीले बिक्रीका लागि कुनै पनि मोडल उपलब्ध गराएको छैन । कुनै समयमा रेभा र ईटुओ लगायतका इलेक्ट्रिक सवारी साधन उपलब्ध गराएर नेपाली ईभी बजारको पायोनियर बनेको अग्नि इनर्जीले अब ल्याउने मोडलका वारेमा चासो हुन पनि स्वाभाविक हो ।

अग्नि ग्रुप अन्तर्गतको अग्नि इन्कर्पोरेटेड प्रालिका डेपुटी डाइरेक्टर वरदान बस्नेत भन्छन्, ‘अग्नि ग्रुप नेपालको ईभी बजारमा पायोनियर कम्पनी हो । आजभन्दा २ दशक अगाडि नै हामीले रेभा ब्रान्डको इलेक्ट्रिक कार ल्याएर बिक्री थालेका थियौ । पछि यसलाई महिन्द्राले उत्पादन थालेसँगै ईटुओ ब्रान्डमा आयो । अहिले पनि यी ब्रान्डको ईभी सडकमा गुडेको हामी देख्न सक्छौ । जहाँसम्म महिन्द्राले हालसालै सार्वजनिक गरेको एक्सयूभी ४०० ईभीको विषय छ, यो गाडी उचित समयमा नेपाल आउने छ । भारतमा अहिले बुकिङ मात्र खुल्ला गरिएको कारण बिक्री शुरु हुन केही समय लाग्ने देखिन्छ । भारतमा बिक्री शुरु भएपछि मात्र यो ईभी नेपाल आउने बाटो खुल्नेछ ।’

यसका आधारमा अबको केही महिना पछि यो गाडी नेपालमा समेत आउने अनुमान गर्न सकिन्छ ।

नेपाली बजारमा अन्य कम्पनीहरुले लगातार रुपमा नयाँ मोडल भित्र्यारहदा महिन्द्राले भने कुनै पनि मोडल उपलब्ध गराउन सकेको छैन । रेभा र ईटुओ जस्ता मोडल पनि छैनन् । यो अवस्थामा आगामी दिनमा महिन्द्रा एक्सयूभीले नयाँ रौनक ल्याउने अपेक्षा गरिएको छ ।

एक्सयूभी ४०० लाई महिन्द्राले दुई वटा ब्याट्री प्याकमा उतारेको हो । यसमा जडान गरिएको ३४.५ किलोवाट आवरको सानो व्याट्री प्याकले ३७५ किलोमिटर र ३९.४ किलोवाट आवरको प्याकले ४५६ किलोमिटर रेन्ज प्रदान गर्ने दावी गरिएको छ । यी दुवै व्याट्री प्याकमा फ्रन्ट एक्सेल माउन्टेड इलेक्ट्रिक मोटर दिइएको छ । जसको अधिकतम पावर १५० एचपी र टर्क ३१० एनएम रहेको छ ।

यो एसयूभीलाई ५० किलोवाट डिसी चार्जरको साहयतामा ५० मिनेटभित्र शून्य देखि ८० प्रतिशतसम्म चार्ज गर्न सकिन्छ भने ३.३ किलोवाट र ७.२ किलोवाट एसी चार्जरको समेत विकल्प दिइएको छ । यसको टप स्पेकमा ७ इन्चको टचस्क्रिन इन्फोटेन्मेन्ट सिस्टम उपलब्ध गराइएको छ भने अन्य फिचरमा सिंगल प्यानल सनरुफ, ओभर दि एयर अपडेट सहितको कनेक्टेड कार टेक्नोलोजी सहित ६ वटा एयर व्याग, चारवटै चक्कामा डिस्क ब्रेक र ब्याट्री प्याकमा आईपी ६७ रेटिङ लगायत सेफ्टी फिचर पाउन सकिन्छ ।

भारतीय बजारमा यो एसयुभीको मूल्य १६ देखि १९ लाख भारुसम्म निर्धारण गरिएको छ । यो मूल्य शुरुवातमा बुकिङ लिने ५ हजार ग्राहकका लागि मात्र लागू हुने कम्पनीको भनाइले पछि यसको मूल्य वृद्धि हुने देखाएको छ । यो एसयूभीले बजारमा टाटा नेक्सन इभीसँग सिधा टक्कर गर्ने देखिएको छ ।

नेपाल आउँदा यसको शुरुवाती मूल्य ४० लाख हाराहारीवाट शुरु हुने अनुमान गर्न सकिन्छ ।