स्मार्टफोन निर्माता कम्पनी साओमीको पहिलो इलेक्ट्रिक कारको फोटो लिक

स्मार्टफोन निर्माता कम्पनी साओमीले इलेक्ट्रिक कार ल्याउने तयारी गरिरहेको छ तर कम्पनीले सो कार लन्च गर्नु भन्दा अघि नै यसको फोटो सामाजिक सञ्जालमा लिक भएको छ ।

मिडिया रिपोर्टका अनुसार साओमीको उक्त इलेक्ट्रिक कारको नाम एमएस११ हुन सक्छ । कम्पनीले सन् २०२१ मा नै इलेक्ट्रिक सवारीसाधन सेगमेन्टमा प्रवेश गर्ने घोषणा गरेको थियो । साथै कम्पनीले आउँदो १० वर्ष भित्र १० अर्ब डलर लगानी गर्ने समेत घोषणा गरेको छ ।

सामाजिक सञ्जालमा लिक भएको फोटो अनुसार यसको डिजाइन अन्य कारहरुबाट प्रेरित भएको देखिन्छ । झट्ट हेर्दा यो कार बीवाईडी जस्तो देखिन्छ । कारमा एलईडी हेडलाइटका साथै ड्युअल टोन स्किम पनि देख्न सकिन्छ । कारको अन्य फिचरको बारेमा भने कुनै जानकारी सार्वजनिक भएको छैन ।

कम्पनीको सो इलेक्ट्रिक कार चीनमा परीक्षणको क्रममा धेरै पटक देखिएको पनि मिडिया रिपोर्टमा दाबी गरिएको छ । कम्पनीले यो सेडान इलेक्ट्रिक कारलाई सबैभन्दा पहिले चीनमा लन्च गर्नेछ ।