प्योर ईभीले ल्यायो फुल चार्जमा १३५ किमी चल्ने इलेक्ट्रिक बाइक इकोड्रिफ्ट

टु–ह्विल निर्माता कम्पनी प्योर ईभीले भारतमा इकोड्रिफ्ट बाइक लन्च गरेको छ । सो बाइकले सिंगल चार्जमा १३५ किलोमिटरको रेन्ज दिने कम्पनीले दाबी गरेको छ । यसका लागि टेस्ट राइड पनि खुल्ला गरिएको छ ।

इकोड्रिफ्टको मूल्य ९९ हजार ९९९ भारु तोकिएको छ । बाइकको टप स्पिड ७५ किमी प्रतिघन्टा छ भने यसको लोड क्षमता १४० किलोग्राम छ । बाइकमा १७.७८ सेमीको एलईडी डिस्प्ले पनि दिइएको छ । साथै यसमा ३ राइड मोड पनि उपलब्ध छ ।

प्योर ईभी इकोड्रिफ्टमा एआईएस १५६ बाट प्रमाणित ३.० केडब्ल्युएचको ब्याट्री जडान गरिएको छ, जसले एक पटक फुल चार्जमा ८५ देखि १३५ किलोमिटरको रेन्ज प्रदान गर्छ । यसलाई चार्ज गर्न ६० भोल्टको चार्जर दिइएको छ । यसबाट ब्याट्री ३ घण्टामा २० देखि ८० प्रतिशत र ६ घण्टामा ०–१०० प्रतिशतसम्म चार्ज गर्न सकिन्छ । इलेक्ट्रिक बाइकमा ३ किलोवाटको इलेक्ट्रिक मोटर रहेको छ । यसको टप स्पिड ७५ किमी प्रतिघण्टा छ ।

इकोड्रिफ्ट बेसिक कम्युटर बाइक हो, जसमा एंग्युलर हेडल्याम्प, ५–स्पोक अलोय ह्विल र सिंगल पीस सिट छ । सो इलेक्ट्रिक बाइक कालो, ग्रे, निलो र रातो गरी ४ रङमा उपलब्ध छ ।