हुन्डाई क्रेटा पनि इलेक्ट्रिकमा, २०२५ सम्ममा सार्वजनिक हुने अनुमान

काठमाडौं– मिड साइज एयूभीमा सर्बाधिक लोकप्रिय मोडल क्रेटालाई हुन्डाईले इलेक्ट्रिक भर्सनमा उतार्ने भएको छ । क्रेटालाई इलेक्ट्रिक अवतारमा उतार्ने गरी कम्पनीले काम अघि बढाएको न्यूज पोर्टल अटो कार इण्डियामा समाचार प्रकाशन भएको छ । यो कार २०२५ को पहिलो क्वार्टरमा लन्च भइसक्ने र मूल्य १५ देखी ३० लाख भारुसम्म पर्ने आँकलन गरिएको छ ।

हुन्डाई इण्डियाले क्रेटा इभीलाई आफ्नो प्रतिस्पर्धी व्राण्ड मारुती सुजुकीले निकट भविष्यमा ल्याउने तयारी थालेको वाइवाई८ इभीसंगै बजारमा ल्याउन लागेको हो । सुजुकीले यो इलेक्ट्रिक एसयूभीलाई टोयोटासंगको सहकार्यमा बजारमा ल्याउने यसअघि नै वताइसकेको छ ।

भारतको प्यासेन्जर कार बजारमा दोस्रो स्थान हाँसिल गर्दै आइरहेको हुन्डाइले हाल कोना र आयोनिक५ इलेक्ट्रिक कार आयत गरी विक्री गर्दै आइरहेको छ । उसले २ दिनपछि आयोजना हुने अटो एक्सपोमा आयोनिक६ लाई समेत प्रदर्शन गर्ने वताएको छ ।

इभी सेग्मेन्टमा टाटा आक्रमक भएर आएपछि कम्पनीमाथी जतिसक्दो छिटो कम मूल्यमा इलेक्ट्रिक कार उतार्नुपर्ने दवाव सिर्जना भएको छ । जसलाई मध्येनजर गर्दै हुन्डाइले सन् २०२८ सम्ममा आधा दर्जन वढी मोडलका इभीलाई भारतमै उत्पादन गर्ने योजना अघि सारेको छ । यो योजना कार्यन्वयन गर्न उसले ५०० मिलियन डलर लागानी थप गर्ने घोषण समेत गरेको छ ।