वुलिङ एयर इभीको मिडिया टेष्ट ड्राइभ सम्पन्न

काठमाडौं– वुलिङ एयर इभीले आइतवार मिडिया टेष्ट ड्राइभ सम्पन्न गरेको छ । नेपालका लागी आधिकारिक वितरक इभी नेपाल मोटर्सले हायत होटलमा आयोजना गरेको सो टेष्ट ड्राइभमा संचारकर्मीहरुको उपस्थिती रहेको थियो ।

कार्यक्रममा वोल्दै कम्पनीका प्रवन्ध निर्देशक प्रकाश बज्रचार्यले वुलिङ व्राण्डको विश्वव्यापी उपस्थिती र नेपाली बजारमा तय भएका आगामी योजनाका वारेमा जानकारी दिए । सानो साइजको यो कारमा आकर्षक इन्टेरियर, ३०० किलोमिटरसम्मको रेन्ज र सुविधा सम्पन्न फिचर उपलब्ध गराइका कारण सिटी ड्राइभका लागी उपयुक्त भएको धारणा व्यक्त गरे ।

नेपाली बजारमा यो मिनी इभीको २०० र ३०० किलोमिटर रेन्ज दिने दुई भेरिएन्ट उपलब्ध छन् । यसको मूल्य क्रमश २४ लाख ९९ हजार र ३० लाख ९९ हजार रुपैयाँ निर्धारण गरिएको छ । वुलिङ इभीले इन्डोनेसियामा एसएआइसी र जीएमसंगको ज्वाइन्ट भेन्चरमा विभिन्न सवारी साधन उत्पादन गर्ने गरेको छ । यो कार इन्डोनेशियाली बजारमा निकै लोकप्रिय रहेको छ ।

फोर सिटर र थ्री डोर यो ह्याचव्याकलाई कम्पनीले ग्लोवल स्मार्ट इलेक्ट्रिकल भेइकल प्लेटफर्मममा बनाएको हो । दुई फरक व्याट्री साइजमा उपलब्ध यसको सर्ट रेन्ज भेरिएन्टमा १७.३ किलोवाट अवारको व्याट्री र ३० किलोवाट क्षमताको मोटर जडान गरिएको छ भने अर्को लङ रेन्जमा २६.७ किलोवाट आवरको व्याट्री र ५०किलोवाटको मोटर जडित छ ।

यसको सर्ट रेन्ज भेरिएन्टमा डिजिटल इन्स्ट्रयूमेन्ट क्लस्टरमात्र दिइएको छ भने लङ रेन्जमा ठूलो साइजको टचस्क्रिन इन्फोटेन्मेन्ट सिस्टम समेत उपलब्ध छ । दुवै भेरिएन्टमा इको, स्पोर्ट र नर्मल मोड उपलब्ध छ । कारमा मल्टी फङ्शनल स्टेरिङ ह्वील, एयरब्याग, एबीएस र हिल होल्ड एशिस्ट जस्ता आधुनिक फिचर दिइएको छ । यो कारको ग्राउन्ड क्लिरियन्स १६५ एमएम रहेको छ ।