२०२२ मा १ लाख ५० हजार इलेक्ट्रिक स्कुटर बेच्यो ओलाले, यस्तो छ कम्पनीको भविष्यको योजना

भारतमा ओला इलेक्ट्रिकले अगस्ट २०२१ मा एस१ र एस१ प्रो इलेक्ट्रिक स्कुटर लन्च गरेको थियो । उक्त इलेक्ट्रिक स्कुटरले बजारमा राम्रो प्रतिक्रिया पाएको छ । कम्पनीले सन् २०२२ मा करिब १ लाख ५० हजार इलेक्ट्रिक स्कुटर बिक्री गर्न सफल भएको खुलासा गरेको छ ।

एस१ स्कुटरमा ३ केडब्ल्युएच युनिट र एस१ प्रो स्कुटरमा ४ केडब्ल्युएच युनिट ब्याट्री जडान गरिएको छ । जसले क्रमशः फुल चार्जमा १४१ र १८१ किलोमिटरको रेन्ज दिन सक्ने कम्पनीको दाबी छ । सो दुबै इलेक्ट्रिक स्कुटरको मूल्य ९९ हजार ९९९ भारु छ ।

ओलाले भविष्यमा इलेक्ट्रिक कार पनि लन्च गर्न सक्ने घोषणा गरेको छ । यसको लागि कम्पनीले तयारी गरिरहेको र आगामी वर्षहरूमा नयाँ उत्पादनहरू पनि लन्च गर्ने योजना बनाएको छ ।

ओलाले सन् २०२३ र २०२४ मा मास–मार्केट स्कुटर, मास–मार्केट बाइक र प्रिमियम बाइकहरु जस्तै स्पोर्ट्स, क्रुजर, एडीभी र रोड बाइक पनि लन्च गर्नेछ । कम्पनीले सो ईभीलाई विश्व बजारमा पनि निर्यात गर्नेछ ।

कम्पनीले आफ्नो पहिलो इलेक्ट्रिक कार सन् २०२४ मा लन्च गर्नेछ र सन् २०२७ सम्ममा ६ विभिन्न उत्पादन बजारमा ल्याउने लक्ष्य रहेको जानकारी दिएको छ ।

नेपाली बजारमा पनि हालै दुई मोडलका ओलाका इलेक्ट्रिक स्कुटर बिक्रीका लागि उपलब्ध भएका छन् ।