ट्राफिक प्रहरी बन्यो झनै कडा : अब २४ घण्टे पुर्जीमा १५ सय जरिवाना

काठमाडौं – ट्राफिक प्रहरीले नियम उल्लंघन गरे वापत लाग्ने जरिवाना बढाएको छ । यो भन्दा पहिले २४ घण्टे पुर्जी वापत ५ सय रुपैयाँ जरिवाना लिने गरेकोमा गत पुस ३ गते देखि नै लागू हुने गरी सो जरिवाना १ हजार ५ सय रुपैयाँ लिने व्यवस्था ट्राफिक प्रहरीले गरेको छ ।

ट्राफिक प्रहरीले एक पत्रमार्फत सो जरिवाना लिन बैंक र मातहतका कार्यालयहरुलाई सो निर्देशन दिएको छ । यस अनुसार कार्यालयले ट्राफिक नियम पालनामा कडाइ गर्न जरिवाना बढाएको जनाएको छ। यो अन्तर्गत १६ नियमहरु छन्। उक्त १६ वटा ट्राफिक नियम उल्लंघन गरेमा अबदेखि १५०० रुपैयाँ जरिवाना तिर्नुपर्ने हुन्छ।

कार्यालयका अनुसार लेन मिच्ने, एकतर्फी जाने, रेड लाइटमा चलाउने, नो टर्नमा सवारी मोड्ने, ट्राफिक संकेत वा इसारा उल्लघंन गरी सवारी चलाउने, नम्वर प्लेट नराखी सवारी चलाउने, पेटी नवाँधी वा हेल्मेट नलगाई सवारी चलाउने, अवस्था ठिक नभएको सवारी चलाउने लगायतका कसुर छन्।