बीवाईडी एट्टो ३ बन्यो भीएबी इलेक्ट्रिक फेमिली कार अफ द इयर २०२३

बेल्जियमको प्रतिष्ठित फ्लेमिस अटोमोबाइल क्लब भीएबीले बीवाईडी एट्टो ३ इलेक्ट्रिक कारलाई ‘भीएबी इलेक्ट्रिक फेमिली कार अफ द इयर २०२३’ घोषणा गरेको छ । युरोपका विभिन्न प्रतिष्ठित कम्पनीहरुका कारलाई पछि पार्दै बीवाईडी एट्टो ३ ले सो अवार्ड हात पारेको हो ।

बेल्जियमको प्रतिष्ठित जोल्डर रेस सर्किटमा तीन दिन लगाएर सम्पन्न गरिएको सो कार्यक्रममा १५ जना व्यावसायिक अटो रिपोर्टर र इलेक्ट्रिक कार प्रयोगकर्ताहरुका ७४ जना पारिवारिक निर्णायक सहभागी भएका थिए । बीवाईडीको सो कारले फक्सवागन, रेनो, सिट्रोन, निसान, कुप्रा, एमजी, एयवेज, सेरेस र साङयोङका विभिन्न मोडलका इलेक्ट्रिक कारलाई पछि पारेको हो ।

बीवाईडी एट्टो ३ इलेक्ट्रिक भेइकल सेगमेन्ट अन्तर्गत बेस्ट भीएबी फेमिली कार बनेको हो । बीवाईडी एट्टो ३ डिजाइन, कम्फर्ट, क्वालिटी र प्राक्टिकालिटीका साथै हाई लेवल अफ वारेन्टी कभर, लो कस्ट पर किलोमिटर, स्पेसियस इन्टेरियर स्पेस, हाई लेवल अफ स्ट्यान्डर्ड फिचर र स्टेट अफ द आर्ट टेक्नोलोजी फिचरका लागि पुरस्कृत भएको बताइएको छ ।

उपयुक्त मूल्यमा उपलब्ध प्रिमियम कार हुनुका साथै फ्रेस डिजाइन, सोलिड फिनिस, युथफुल अपियरेन्स, फ्युचरिस्टिक ककपिट, ग्रेट सिट, लार्ज बुट स्टोरेज र ग्रेट ह्यान्डलिङ आदि फिचर समेत यसमा उपलब्ध भएको बताइएको छ ।

बीवाईडी एट्टो ३ लाई युरो एनक्यापले सुरक्षाका लागि फाइभ स्टार रेटिङ प्रदान गरेको छ । युरोपमा गत २०२२ को अक्टोबरमा सम्पन्न पेरिस मोटर शोमा पहिलो पटक सो कार लन्च गरिएको थियो ।

सो कारमा ५ जना बस्न मिल्ने प्रशस्तै स्पेस छ भने ४४० लिटरको बुट स्पेस छ, जसलाई रियर सिट फोल्ड गरेर ११३८ लिटर सम्म बढाउन सकिन्छ । सो इलेक्ट्रिक कारमा ६०.४८ किलोवाट आवरको प्रतिष्ठित ब्लेड ब्याट्री छ, जसले सिंगल चार्जमा ४२० किलोमिटरको रेन्ज दिन्छ ।

बीवाईडीले आफै उत्पादन गरेको ब्लेड ब्याट्री यसमा प्रयोग गरिएको छ, जुन अन्य ब्याट्रीको तुलनामा निकै नै सुरक्षित मानिन्छ । यसमा प्रयोग भएको लिथियम आइरन फस्फेट परम्परागत लिथियम आयोनको तुलनामा बढी सुरक्षित हुन्छ ।

युरोपमा बीवाईडी एट्टो ३ नर्वे, स्वीडेन, डेनमार्क, फ्रान्स, नेदरल्यान्ड र बेल्जियममा लन्च भइसकेको छ । त्यसैगरी युके, जर्मनी, स्पेन, इटाली, अष्ट्रिया, लक्जेम्बर्ग र फिनल्यान्डमा सन् २०२३ मा बीवाईडी स्टोर खुल्ने छ ।

विश्वकै प्रमुख न्यु इनर्जी भेइकल र पावर ब्याट्री उत्पादक कम्पनीको रुपमा परिचित बीवाईडीले चीनमा उत्पादन गरेका सवारी साधन नेपालमा समेत उपलब्ध छन् । नेपाली बजारमा साइमेक्स इंकले बीवाईडीका सवारी साधन बिक्री–वितरण गरिरहेको छ । बीवाईडी एट्टो ३ नेपाली बजारमा समेत उपलब्ध छ ।