होन्डाले सार्वजनिक ग-यो इलेक्ट्रिक स्कुटर

होन्डाले मिलानमा चलिरहेको ईआईसीएमए २०२२ मा आफ्नो पहिलो ई–स्कुटर ईएम१ई सार्वजनिक गरेको छ । सो स्कुटर सिटी राइडको लागि डिजाइन गरिएको छ । यद्यपि यसको बारेमा कम्पनीले अझै जानकारी दिएको छैन र यो एक प्रोटोटाइप मोडल हो ।

कम्पनीले ईएम१ईको छोटो भिडियो पनि सार्वजनिक गरेको छ । कम्पनीले यसको ब्याट्री क्षमता र पावरट्रेनको बारेमा अहिलेसम्म कुनै जानकारी दिएको छैन ।

कम्पनीले दिएको जानकारी अनुसार सो स्कुटरको रेन्ज निकै कम छ । यसको रेन्ज मात्र ४० किलोमिटर रहेको छ । तर, कम्पनी स्रोतका अनुसार बजारमा लन्च हुँदा यसको रेन्ज बढाएर १०० किलोमिटर भन्दा बढी हुनेछ । यसमा १० इन्चको अलोय ह्विल जडान गरिएको छ ।

कम्पनीका अनुसार सो स्कुटर २०२३ मा युरोपेली बजारमा लन्च गर्नेछ । यद्यपि अन्य देशमा कहिले लन्च हुने जानकारी दिइएको छैन । सो स्कुटरको ओला, हिरो भिडा र टीभीएस आइक्युबसँग प्रतिस्पर्धा हुनेछ ।

सन् २०२५ सम्ममा होन्डाले १० वटा इलेक्ट्रिक दुई पाङ्ग्रे सवारी साधन लन्च गर्ने लक्ष्य राखेको छ ।